Amaia Agirre Getxoko alkateak gogoratu du gaur “Getxok beste urtebetez itxaron beharko du jaiak bere formatu tradizionalean ospatzeko. COVID-19aren azken datuak eta espazio publikoetan edukiera mugatzeari lotutako osasun publikoko irizpideak ebaluatu ostean hartu dugu erabaki hori”.
Positiboen kopurua gora egiten ari da, eta ez dirudi joera hori aldatuko denik uda-garaian. “Asko baloratu dugu, eta uste dugu erabaki hori zentzuzkoena eta zuhurrena dela, argi baitugu osasuna funtsezkoa dela eta birusa eta haren aldaera berriak geldiarazteko beharrezko neurriak betetzen jarraitu behar dugula”, zehaztu du Agirrek.
Alkateak gogora ekarri du Getxoko Udala eta udalerriko auzoetako jai-batzordeak elkarlanean aritu direla jaiak eta Paellen Nazioarteko Lehiaketa antolatu ez daitezen. “Beraz, aurten, ez da ospakizunik izango. Mesedez, getxoztar guztien lankidetza behar dugu. Elkarte, erakunde, gazte eta adineko guztiena. Pilaketak ekidin eta muxukoa erabili”.
Uztailean, abuztuan eta irailean, gozatzeko beste ekitaldi batzuk izango dira Getxon. “Eta, jakina, beste aukera batzuk lantzen jarraituko dugu, alaitasuna, umore ona eta dibertsioa gure kaleetara eta bizitzetara itzultzea lortzeko”.
