Uda honetan, Getxoko Azkorri inguruak autoz betetako irudiak ikusi ahal izan dira, behin baino gehiagotan. Auto-pilaketak egon dira bertan, eta ibilgailuak aparkatuta egon dira nonahi, berdeguneak eta natura-guneak errespetatu barik. Egoera horren aurrean, oposizioko taldeek hainbat proposamen egin zituzten atzoko osoko bilkuran.
Alde batetik, PPk proposatu zuen berdegune horretan 100 plazako aparkaleku berri bat egitea. Horren aurrean, Elkarrekin Podemoseko zinegotzi Carolina Uribek erantzun du "burutazio" horrek, trafiko gehiago erakartzeaz gainera, garraio publikoa erabiltzea eragotziko lukeela. Hala, mozio horren aurka bozkatu zuten talde guztiek.
Bestalde, EH Bilduk Azkorri babesteko mozio bat aurkeztu zuen, eta Elkarrekin Podemosek zuzenketa bat aurkeztu zion. Proposamen horrek, besteak beste, garraio publikoak areagotzea eta baimendutako guneetatik kanpo aparkatzea debekatzea eskatzen zuen. Hala ere, proposamen horrek ere ez zituen behar besteko botoak jaso, eta baztertu egin zuten.
