Elkarrizketak

Joserra Onandia Longarte: "Inoiz ez da berandu euskara ikasteko"

Joserra Onandia.

Algortako Bidebitarte txokoan ipini dugu hitzordua Joserra Onandia getxoztarragaz elkarrizketa egiteko. Bertan sukaldari lanetan ibiltzen da 76 urteko euskaltzalea, baina beste saltsa askotan ere dabil: berbalagun taldeak, Bizilagunak, Itxarkantu, Mintzanet... Onandia ez da geldi egotekoa. Euskararen alde egindako lana eskertzeko helburuagaz, Argia Ereiten saria jaso barri du Getxoko Udalaren eskutik: "Oso hunkituta nago".

Erretiroa hartu zuenean hasi zen euskara ikasten, nahiz eta aurretik hainbat saiakera egin: "Euskalduntzeko errezetarik onena euskaltegira joatea da, baina egunero joan behar da! Eta gero, aukeran, barnetegira!". Dioenez, euskara ikasteko inoiz ez da berandu, adinekoentzat ere ez: "Burua aktibo izateko modurik eraginkorrena da, euskara ikastea edozein pilula hartzea baino hobea da buruarentzat!".

Aurrez aurre euskaraz berba egiteaz gain, online ere mingainari eragiten dio algortarrak, Mintzanet plataformaren bidez. Besteak beste, Floridan (AEB) bizi den Pedro Mari Sardui zesta-punta pilotariagaz batzen da, bizkaieraz eta guzti! "Eguaztenero batzen gara ordu eta erdiz euskara praktikatzeko. Biak sukaldariak gara gainera!".

Onandia lanbidez kontratista izan da, baina beti izan du euskararekiko maitasuna: "Euskara da euskaldunok dugun altxorrik handiena". Bere emazte, seme-alabak eta bilobak euskaldunak dira, eta bera ere, bidean... "Emazteak esaten zidan liburuak bezala egiten nuela berba. Berak dioen bezala, ‘pazientzixe’ handia izan du nigaz". Argia Ereiten saria euskara ikasten ari diren guztiei eskaini gura izan dio: "Batik bat nagusientzat, zelako esfortzua den euskara ikastea... Baina zelako poztasuna dugun gero euskaraz berba egiterakoan!". 

Erlazionatuak

Joserra Onandia: "Getxoko sari garrantzitsuena da niretzat. Galan askotan izan naiz, eta, oraingoan, seguru hunkitu egingo naizela"

Getxo

Joserra Onandia getxoztarrak jasoko du datorren azaroaren 17an, eguaztenean, Argia Ereiten Euskara Saria. Aitortza horren bidez, euskara ikasteko e...
Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun