Auzokideek ez dute gura Lope de Vega kaleko udal-eraikinak eraistea

Hainbat bozketa-gune jarri zituzten domekan, tartean, Santa Eugenia plazan. © Eraisketari Ez - Romo plataforma

Atzo, maiatzak 8, egindako herri-galdeketan parte hartutako herritarren % 98k Lope de Vega kaleko eraikin "historikoak" eraistearen kontra bozkatu zuen; 1.547 boto zenbatu zituzten iritzi horregaz. "Emaitzok berresten dute, beste behin ere, eraikin hauek mantentzeko sentsibilitate handia dagoela", azaldu dute Eraisketari Ez - Romo Plataformakoek.

Joan den uztailean, Eraisketari Ez - Romo plataformak 4.000 sinadura baino gehiago batu zituen Lope de Vega kaleko 12 zenbakiko eraikinen inguruko herri-galdeketa bat egin zezan eskatzeko Udalari; auzoko 17 kolektibok eta elkartek ere ideia hori babestu zuten. Hala ere, gobernu-taldeak eskaera hori onartu ez duela deitoratu du plataformak eta, hori dela eta, bere kabuz, auzokideei euren iritziak eskatzeko herri-galdeketa egin zuen atzo, domekan, Itzubaltzeta/Romon.

Plataformako kideek azpimarratu dutenez, parte-hartzea "handia" izan zen atzokoa, eta sortutako giroa "benetan aldarrikatzailea". Guztira, 1.571 boto zenbatu zituzten, horietatik gehienak, % 98, eraistearen kontrakoak: 1.547 boto. Bederatzi bozka, aldiz, eraikinak eraistearen aldekoak izan ziren, 14, zuriak izan ziren, eta baliogabe bat zenbatu zuten.

Emaitzon aurrean, Eraisketari Ez - Romo plataformak ondorioztatu du eraikinok mantentzeko "sentsibilitate handia" dagoela herrian eta, ebidentzi horren aurrean, Udalari eta Bizkaiko Foru Aldundiari eskatu dio birplanteatu dezatela belaunaldien arteko zentroa egiteko proiektua auzoaren erdian egitea, "herriaren borondatearen aurka".

Belaunaldien arteko zentroa

Itzubaltzeta/Romoko Lope de Vega kalean dauden Nagusien etxe eta euskaltegi zaharrak batzen dituen eraikinak bota gura ditu Getxoko Udalak, Bizkaiko Foru Aldundiaren laguntzagaz, belaunaldien arteko zentro bat egiteko. Horren aurrean, Romo plataformak deitoratu du "auzoko memoria historikoa suntsitu" egingo dutela, eta azpiegitura hori "Bizkaiko beste edozein lekutan" egiteko proposatu du, "Romo auzoari ezinbesteko zerbitzua ematen dion ekipamendua hondatu beharrik gabe".

Kontuak horrela, beste behin ere, Lope de Vega kaleko eraikinak eraisteko asmoa bertan behera utz dezatela eskatu dio Getxoko Udalari eta Bizkaiko Foru Aldundiari: "Auzoarentzako benetako proiektuak nahi ditugu, haien beharrei erantzungo dietenak, gure eraikinak eta ingurua errespetatuz".

Erlazionatuak

Gaur egingo dute Lope de Vega kaleko eraikinen etorkizunari buruzko herri-galdeketa

Getxo

Joan den apirilaren 3an egitekoak ziren Itzubaltzeta/Romoko Lope de Vega kaleko 12 zenbakiko eraikinen inguruko herri-galdeketa. Halere, azkenengo ...
Romoko belaunaldien arteko zentrorako lehen izapidea onartu du Getxoko Udalbatzak

Getxo

Getxoko gobernu-taldeak (EAJ eta PSE-EE) aurrera atera du Romoko Lope de Vega kalean lekutuko den etorkizuneko belaunaldien arteko zentroa egiteko ...
Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun