Ibar Nagusien Etxea elkarteko kideek gogor salatu dute gobernu-taldearen jokabidea behin baino gehiagotan, eta uztailaren 26ra bitartean, kartelak jarriz eta herritarrak informatuz bere horretan jarraituko dutela azaldu dute, nagusien etxeagaz gertatzen ari dena salatzeko kanpaina bategaz.
Hala ere, ekimen garrantzitsuena astelehen iluntzean hasiko dute, uztailaren 25ean Itzubaltzeta/Romoko Lope de Vega kaleko 12 zenbakiko udal-eraikinean elkartuko baitira bertan gaua igarotzeko. Hurrengo egunean, eraikina husteko azken egunean, bertan jarraituko dute, eta, horretarako, egun osorako jarduerak prestatu dituzte, hala nola ekintza ludikoak, herri-bazkaria eta bingo masiboa.
Iluntzera arte egongo dira, Udalak hartu dezakeen erabakiaren zain. Paco Rama Ibar Nagusien Etxea elkartearen presidenteak azaldu duenez, aurkeztu dituzten errekurtsoen ebazpenei itxaron behar dio Udalak ezer egin aurretik. Hala ere, gobernu-taldea edozer egiteko prest dagoela uste dutela azaldu du, eta Ertzaintzaren brigada mugikorra bidaliko dutela mehatxu egin diete nahitaezko hustea egiteko, baita zigor ekonomikoen mehatxuak egin ere.
