Bilboko epaitegiak hala aginduta, momentuz, Getxoko Udalak ezin izango du gaur goizean hustu eta hesitutako Lope de Vega kaleko udal-eraikina eraitsi. Ibar Nagusien Etxea elkarteko kideek uztailaren 26a baino lehen azpiegitura uzteko agindua jaso zuten Udalaren partetik, baina horren kontrako helegitea aurkeztu zuten. Gaur goizera arte, oraindino ez zuten jasota ebazpenik, baina, halere, Udalak epe guztiak beteta zituela esanez, Ertzaintza eta Udaltzaingoa ingurura gerturatu eta eraikinak hesitu eta hustu ditu.
Jardun hori legez kanpokoa zelakoan, Ibar Nagusien Etxea elkartekoek salaketa jarri dute, eta gutxira eman du epaileak gaur goizean abiarazitako lanak bertan behera uzteko agindua, behin-behinean, egoera aztertu eta behin betiko ebazpena egin arte.
