Eraikinaren eraisketa berehalakoa izan daitekeela ohartarazi du Paco Rama Ibar Nagusien Etxeko presidenteak; izan ere, gaur goizeko 06:00ak inguruan, Ertzaintza eta Getxoko Udaltzaingoko agenteak bertaratu dira eta Nagusien Etxeko inguruko kaleak blokeatu eta aldamenean aparkatuta zeuden autoak kendu dituzte udal-garabi bategaz. Gainera, agenteak eta udal-langileak eraikinera sartu eta ateak xafla batzukaz hormatu dituzte, eta Redenor enpresako beharginak eraikinaren inguruan egon dira hori hesitzeko lanetan.
Horren aurrean, dozenaka pertsona bertaratu dira goizetik eta eraisketaren aurka daudela adierazteko protesta zaratatsua egin dute. Kazolen, txilibituen eta danbor hotsen artean eraisketaren aurka eta Nagusien Etxearen aldeko aldarriak oihukatu dituzte. Lekuko batzuek jakinarazi dutenez, Ertzaintzak bertan zeuden hainbat herritar identifikatu ditu, gertatzen ari zenaren argazkiak ateratzen saiatzeagatik.
Ertzaintza, Udaltzaingoa eta udal-langileak bertaratu dira bart Romoko Nagusien Etxera. Lekukoek diotenez, kalea moztu dute, eta inor ezin da sartu inguru horretara. Diotenez, baliteke gaur bertan eraikina zigilatzea, ondoren berau bota belaunaldien arteko zentroa eraikitzeko. pic.twitter.com/8JmCnXAJt2
— Hiruka (@HirukaEus) August 17, 2022
Getxoko Udalaren asmoa da eraikina hustu eta eraistea, Bizkaiko Foru Aldundiagaz onartu duten belaunaldien arteko zentro bat eraikitzeko proiektuagaz jarraitzeko.
Errekurtsoa ebatzi gabe
Udal-gobernuak (EAJ eta PSE-EE) uztailaren 26a baino lehen Nagusien Etxetik alde egin behar zutela jakinarazi zien erabiltzaileei; gainera, hala egin ezean, Ertzaintzaren Brigada Mugikorra bidaliko zutela ohartarazi zien. Hala ere, Ibar Nagusien Etxeko bazkideak abisu horren aurka azaldu ziren, eta erabaki zuten ez zutela eraikina euren kabuz utziko.
Era berean, epaitegietan errekurtsoa jarri zuten Udalaren erabakiaren aurka. "Errekurtso hori oraindik ebatzi gabe dago, beraz, uste dugu babes judizialpean gaudela", azaldu du Ramak. Hori dela eta, elkarteko presidenteak iragarri du gaur bertan salatuko dituztela Udaltzaingoaren burua eta Getxoko Udala, "legez kanpoko jarduera baten aurrean gaudela uste baitugu".
Eguerdiko 12:00etan elkarretaratzea zuten deituta herritarrek protesta egiteko.
— Hiruka (@HirukaEus) August 17, 2022
Bitartean, udal-langileak eta eraikina eraisteko ardura duen enpresako beharginek lanean segitzen dute. pic.twitter.com/3gjbZFyl7x
Bestalde, Udalak "legezko epeak" bete dituela adierazi du udal-titulartasuneko eraikina berreskuratzeko. Horrenbestez, udal-beharginak eta belaunaldien arteko zentro berriaren obrez arduratuko den enpresako langileak eraikinera sartu dira hori eraisteko beharrezkoak diren lanei ekiteko.
