Fadurako gizarte eta kirol zentro berria egiteko obrak hasi dituzte, garagardotegi zaharrean

Erredakzioa 2022ko abe. 6a, 17:46
Gune berriak izango duen itxura, barrutik. © GETXOKO UDALA

Fadurako gizarte eta kirol zentro berria eraikitzeko lanak martxan dira, garagardotegi zaharraren inguruan. Zentro berriak 850 metro koadroko azalera erabilgarria izango du eta beste 2.100 metro koadroko azalera eraikinaren kanpoaldean. Bertan, kirol-kluben jarduera soziala egiteaz gain, kirolaren sektorean berrikuntzagaz zerikusia duten enpresentzako berrikuntza-poloa egongo da. Getxo Kirolak udal-erakundeak 2,2 milioi euro pasatxo zuzenduko ditu eraikin berria egiteko. Herriko elkarteek ere parte hartu dute zentroaren diseinuan, eta aurreikusita dago eraikuntza-lanak 18 hilabeteko epean egitea.  

Proiektuak garagardotegi zaharraren izpiritu sozialari eusten dio; garagardotegian egiten ziren kirol-erakundeen eta Getxoko beste eragile sozial batzuen bilerak eta ospakizunak. Hori dela eta, funtzio anitzeko ekipamendua egitea pentsatu dute, hiru giro izango ditu, bereizita egongo direnak: areto handi bat, itxia eta girotua (bigarren solairu bategaz berrikuntza-polorako), eta beste bi gune, jarduera bakoitzaren premietara egokitzeko, estalitako eta erdi estalitako eremu eta guzti.

Eraikin berriaren ezaugarriak garagardotegi zaharra erabiltzen zuten erakundeakaz batera diseinatu dituzte, eta obra Thinking Fadura egitasmoaren testuinguruan kokatzen da; hau da, Fadura esparru publiko berri bilakatzeko proiektua. Eremu horretan, sarrera libreko parke bat eta Getxo Kirolak-eko abonatuek kirola praktikatzeko instalazioak egongo dira.

Thinking Faduraren lehen proiektu handia

Lanak uholde-arriskuko eremu batean egingo direnez, obra egiteko baimenak lortzeko beharrezko aldia gainditu behar izan dela azaldu dute udal-iturriek, eta pandemiaren ondorioek eragindako atzerapen eta guzti, Fadurako gizarte-zentro berria, eraikiko den lehen ekipamendu handia izango da, 2.000 pertsona ingururen parte-hartzea izan duena osatutako proiektuaren ondorioz.

Aldi berean, Getxo Kirolak lehentasuna duten hurrengo proiektuak lantzen ari da. Horien artean daude pilotalekuen eraikinaren egitura indartzeko lanak, ondoren barrutik berritzeko, eta errugbi zelaiko eta atletismo pistako harmailak ordezkatuko dituen eraikin berria. "Horri esker, kirol instalazio horietako erabiltzaileek eskatutako espazio berriak izango dira eta erosotasunean irabaziko da. Inbertsioak lehenesterakoan, aurreikusita dago, halaber, padel eta tenis pista estali gehiago hartuko dituen eraikin berriaren aurreproiektua idazten hastea edota parke publiko berria faseka urbanizatzea", azaldu dute.

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun