Getxo Rugbyko emakumeen taldeko jokalariek amaiera eman diote aurtengo denboraldiari, joan den zapatuan, apirilaren 29an, Olimpico Pozuelo taldearen kontra 31-12 galdu eta gero. Promoziozko partidu hori Ohorezko A Mailara igotzeko azken aukera zen, izan ere, apirilaren 23an Bartzelonaren aurkako partidua ere galdu zuten, 3-5eko emaitzagaz. Partidua gura zuten bezala bukatu ez arren, Getxo Rugbyko kide Ariane Torrontegik adierazi du amaiera arte "dena" eman zutela garaipena lortzeko eta eskerrak eman die denboraldi honetan haiek animatzera joan diren pertsona guztiei.
Apirilaren 29an, zapatuan, Valladoliden (Gaztela eta Leon, Espainia) jokatu zuten Getxo Rugbyko jokalariek euren denboraldiko azken partidua. Azkenean, hori-beltzek ez zuten garaipena lortu, eta taldeko kide den Ariane Torrontegik azaldu duenez, partidu zaila izango zela aurreikusten zuten: "Bagenekien partidu gogorra izango zela, eta horrela izan da. Meleetan gu baino gogorragoak izan dira, baina, hala ere, uste dut joko irekian guk eduki dugula kontrola".
Hala, Torrontegik hurrengo urtera arte agurtu ditu zaleak, betiere eskerrak emanez haien jarraipen beroagatik.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
