Azkorriko Zintoetxeko biribilguneari buruzko bi epaiketak galdu ditu Getxoko Udalak; azkena, Euskadiko Auzitegi Nagusiaren ebazpena izan da, biribilgunea "legez-kanpokoa" dela azpimarratuz. Hala ere, Azkorri Bizirik elkarteak deitoratu du Udalak beste behin errekurritu duela, euren eskariari "muzin" eginez, eta, gainera, azpimarratu du herritarren "dirutza" xahutzen ari dela auzi galduetan. Horregatik, Getxoko Udalaren jokabidea publikoki salatu dute: "Auzotarren aurka erakusten ari diren jarrerak agerian uzten du beren demokrazia eskasia".
Azkorri Bizirik elkarteak deitoratu du, afera honetako auzibideak "dirutza" bat suposatzen duela: "Udala ere gure dirua baliatuz ari da, herritarron dirua auzi galduetan xahutzen. Legea eta justizia bidezkoak diren tokietan ekintza horri lapurreta deitzen zaio".
Horren aurrean, elkarteak ezinbestekoa deritzo aktiboki herrian inplikatzea: "Herritarroi dagokigu geure buruak antolatzea guztion Udala eratzeko eta autoritarismo honi behar bezala erantzuteko".
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
