San Nikolas kaleko 11 zenbakian 12 etxebizitza eraikitzeko proiektua dago, eraikin zaharrean sei birgaituta, eta eraikin berri batean beste sei eraikita. Aurreproiektuaren arabera, XIX. mendeko “Irurak Bat” jauregiaren hormak mantendu behar ziren, “barrualdean ondoan eraikiko duten etxebizitza berrien erosotasun modernoa” txertatuta.
Ildo horretan, tokiko auzokide batzuek gogoratu dute eraikin hori udal-zaintzapekoa dela eta, ondorioz, babestuta dagoela. Hala ere, deitoratu dute obrak hasi eta gutxira eraikina hustu, teilatua kendu eta hegoaldeko horma bota zutela; bitartean, beste hiru fatxadak aldamioz habetuta mantendu zituzten. Uda bete-betean, baina, Algortako saninazioak pasata, zutik zirauten etxe-aurreak ere bota zituzten, Udalaren lizentziarik gabe, auzokideek salatu eta HIRUKAk baieztatu ahal izan duenez.
Auzokideek jakinarazi dutenez, “Irurak Bat” eraikinak babes maila baxuena zuen, udal-zaintzapeko eraikina baitzen; hala, hura eraisteko aukera zegoen, betiere Udalari lizentzia eskatuta eta dagokion prozedura jarraituta. Hala ere, kasu honetan ez da halakorik izan, eta, ondorioz, obrak behin-behinean geldiarazteko agindua eman zuten abuztuaren 9an Getxoko udal-zerbitzu teknikoek, obra-lizentzian ezarritako baldintzak bete ez direlakoan. Hori horrela, Getxoko Udalak hilabeteko epea eman dio obren arduradunari egoera erregulariza dezan.
Egoera honen aurren, hainbat auzokide kexu dira Getxon konparaziozko bidegabekeria dela Algorta eta Neguri aldeko egoeragatik. Diotenez, bigarren auzoan hainbat etxebizitza historiko birgaitu dira, fatxadak mantenduta, Algortan hainbat bota dituzten bitartean, hala nola Haurtegia, Errementarienako etxea eta, orain, “Irurak Bat”.