Getxoko Instrukzio Epaitegiak behin-behinean artxibatu du Europa ikastetxeko irakasle baten aurkako sexu-erasoengatik abiatu zen auzia, froga nahikorik ez dagoela argudiatuta. Irakaslearen aurka lau urteko lau neskatoren familiek jarritako salaketek abiatu zuten iazko maiatzean ikerketa.
Irakasleak bi eta hiru urte artean zeramatzan Getxoko Europa ikastetxean lanean, eta salaketak publiko egin zirenean, ikastetxeak berehala apartatu zuen. Protokoloari jarraituz, kasua sakon ikertu da, eta txosten medikuek haurretako baten genitaletan sexu-erasoen zantzu arinak detektatu zituzten. Hala ere, psikologoek eta gizarte-langileek haurrek emandako testigantzak aztertuta, ez dute froga nahikorik aurkitu irakaslea inputatzeko.
Epaitegiak, Fiskaltzaren babesagaz, behin-behinean itxi du auzia. Halere, kasua ez da amaitu; etorkizunean froga berriak agertuko balira, berriro irekitzeko aukera egongo litzatekeelako.
Ildo horretan, salaketa jarri zuten familiek ziurtatu dute abusuak frogatuta daudela, eta ikerketa irregularra izan dela deitoratu dute. Azaldu dute sexu-abusuak egiaztatu zituzten pediatrek ezin izan zutela deklaratu, ezta autismoa duen eta abusuak pairatu dituen neskato baten amak ere. Gainera, aldarrikatu dute lau neskatoen deklarazioak errepika daitezela, "baina giro lasaiago batean, ez ikaratzeko".
Hori dela eta, ikerketa berriro martxan jar dezatela eskatzeko, elkarretaratzea deitu dute barikurako, 19:00etan, Algortako Telletxe plazan.
