Urteak dira, Getxon, Euskal Herrian bezala, eraso matxistei erantzuteko protokoloak martxan jartzen direla, zergatik?
Mugimendu Feministak ez ditu kasualitatez edo kapritxoz protokoloak egin eta aktibatzen, beharrizan gordin batengatik baizik: badakigu sistema honek indarkeria sostengatu eta tresna gisa erabiltzen duela, araua betearazi eta botereari eusteko. Indarkeria matxistak ere berdin jokatzen du: zisheteropatriarkatuan gizonek etengabe erreproduzitzen dute indarkeria matxista, etengabe erasotzen dute, are gehiago, jaien testuinguruan, alkoholaren eta "desfasearen" aitzakian. Protokoloak testuinguru horretan ematen diren ohiko gertakari, jarduera edo egoerei erantzuteko ordenatzen diren ideiak edo urratsak dira. Hartara, urrats horien bidez lortzen den emaitzak beti izan beharko luke berdina: autodefentsa feministatik, erasoa jasan duen pertsona babestea eta gertaera salatzea da helburua.
Noiz aktibatzen da protokoloa eta zer salatu daiteke eta zer ez?
Eraso matxisten protokoloetan Mugimendu Feministak definitzen du zer den eraso bat, eta, beraz, zer sartzen den protokoloaren barruan eta zer ez; esaterako, auzitegietan ibilbiderik izango ez luketen eraso asko. Protokoloak erantzuna ez ezik, lekua eta babesa ematen die minari, amorruari edo, besterik gabe, informazioa jaso, partekatu, bideratu, salatu... nahi duten norbanakoei, izan erasoa jasan duenari, izan lekuko izan denari.
Nork hartzen du protokoloa aurrera eramatearen ardura?
Getxoren kasuan, erasoa jasan duen pertsona artatzeko Errotik kooperatiba kontratatzea lortu genuen duela bi urte; bitartean, Mugimendu Feministatik salaketa soziala egiten jarraitzen dugu. Lorpen handia da guretzat, orain arte, guk jartzen genituelako gorputza, aurpegia, denbora, izerdia eta, sarritan, baita malkoak ere. Erakundeekin eta poliziarekin etengabe harremanetan egon behar izateak izugarri higatzen du, inongo babesik gabe jardun behar izan dugulako. 2022ko Portu Zaharreko gertakariaz geroztik, protokoloak martxan jartzeko aitortza eta, Errotiken kontratazioarekin, babesa lortu ditugu, eta argi geratu da guk aspalditik genekiena: Mugimendu Feministak jakintza metatua duela, badakigula protokoloak egituratzen, eta bagarela nor hori egiteko. Horrek, instituzioen aitortza eta konpromisoa ekarri behar dizkigu: Errotik bezalako kooperatiba bat kontratatzeaz gain, baita aurretiazko lanketak eta prebentzioa jorratzea ere.
Ver esta publicación en Instagram