Koalizio soberanistak duela hiru hilabete salatu zuen egoera, eta orain adierazi du bere helegiteek eta salaketek "emaitzak ematen hasi" direla: "Eusko Jaurlaritzak Getxoko hainbat etxebizitza eta logela turistikoren egiaztapen-prozedurak abiatu ditu, eta Udalari berriro eskatu dizkio dagozkion hirigintza-txostenak". Gainera, EH Bilduren arabera, Jaurlaritzak argi utzi dio oraingoan txostenak legez ezarritako hiru hilabeteko epean bidali behar direla, aurreko urteetan "txosten ugari urtebeteko atzerapenarekin" bidali zirela salatuta.
EH Bilduk 17 espediente berrikusteko eskatu zuen, eta udal-araudia urratuta jarduten ari ziren establezimenduen aurka neurriak hartzea exijitu. Koalizioak azaldu duenez, Udalak berak aitortu du azken asteotan 15 txosten-eskaera berri jaso dituela Eusko Jaurlaritzatik, eta kasu gehienetan aurkako txostenak bidali dituela; horrek, egiaztapen-prozedurak amaitzean, udal-araudiagaz bateragarriak ez diren jarduerak ixteko eta Eusko Jaurlaritzaren erregistrotik kanporatzeko bidea zabal dezake.
Testuinguru honetan, EH Bilduk udal-gobernuaren (EAJ eta PSE-EE) jarduna kritikatu du, eta Mikel Bildosola bozeramaileak adierazi duenez, "gai honetan dagoen immobilismo instituzionala ez da kasualitatea, etxebizitza eskubidea irensten duen ereduari alfonbra gorria baizik". Koalizioak azpimarratu du neurriak "albiste ona" direla, baina ohartarazi du egoerara iritsi izana udal-gobernuaren "utzikeriaren" ondorio dela, eta "etxebizitza eskubidea defendatzen eta araudia benetan bete dadin exijitzen" jarraituko duela.
