Segurtasun Sailak zabaldutako informazioaren arabera, askatutako emakumeak egoera zaurgarrian zeuden, eta etxebizitzan "baldintza abusiboetan" aritzera behartuta zeuden. Poliziaren ikerketaren arabera, arduradunek kontrola, mehatxuak eta presio ekonomikoa erabiltzen zituzten haien gain; besteak beste, jasotako diruaren zati handi bat entregatzera behartzen zituzten eta etxetik irteteko askatasuna mugatua zuten.
Itaia Uribe Kostak gogorarazi du otsailean ere antzeko kasu bat azaleratu zela Getxon: orduan beste hiru emakume askatu zituzten sexu-esplotazio sare batetik. Talde feministaren arabera, bi kasuek erakusten dute emakume asko "miseriazko baldintzek bultzatuta" harrapatzen dituztela sexu-esplotazio sareek, eta egoera horrek emakumeen aurkako indarkeria matxistaren adierazpenik gordinetako bat erakusten duela.
Taldeak salatu du sexu-esplotazioaren atzean emakumeen zaurgarritasun ekonomikoa eta soziala dagoela, eta emakumeen gorputzen eta miseriaren kontura etekin handiak lortzen direla. Horren aurrean, sexu-merkatuaren aurka antolatzeko eta haren "konplizeak" seinalatzeko beharra aldarrikatu dute, kontsumitzaileak zein proxenetak jomugan jarrita.
"Sexu-esplotazioaren aurka borrokatu! Indarkeria matxista orori aurre egin!" lelopean, Itaia Uribe Kostak herritarrei dei egin die halako kasuak salatzera eta emakumeen aurkako indarkeria oro borrokatzera. Taldearen iritziz, ezinbestekoa da gaurdanik lanean jarraitzea sexu-esplotazio sareak eta horiek ahalbidetzen dituzten baldintza sozialak desagerrarazteko.
