Gorlizko garbiketa-zerbitzuko langileek soldata-arrakala ezabatzeko akordioa eskatu dute

Gorlizko eraikin publikoetako garbiketa-zerbitzuko langileek 140 egun baino gehiago daramatzate greba mugagabean. Eskatzen dute kale-garbiketako langileen soldata bera izatea, bien arteko aldea 7.000 eurokoa dela diotelako. Gaineratzen dute beraiena gehienbat emakumezkoen sektorea dela, bestea ezbezala.

Gorlizko eraikin publikoak garbitzeaz arduratzen diren azpikontratako langileek uztailaren 1etik daramate greba mugagabean; besteak beste, ikastetxeak ez du garbiketa-zerbitzurik izan ikasturtea hasi zenetik. Aldez aurretik, pandemiaren hasi baino lehen, eta 2021eko apirilean, maiatzean eta ekainean ere lehen geldialdiak egin zituzten. Orain arte ez dutenez inolako akordiorik lortu langileek greba mugagabean jarraitzea erabaki dute.

Beraien eskakizuna da kale-garbiketaz arduratzen diren beharginen pareko soldata izatea; izan ere, salatu dutenez, bien arteko aldea 7.000 euroko da. Gainera, kaleetako garbiketaz arduratzen direnak gehienbat gizonak diren bitartean, deitoratu dute eraikinetako garbiketaz arduratzen diren langile gehienak emakumeak direla: "Erakundeek soldata-ezberdintasunari buruzko propaganda egiten dute, baina eten hori kentzeko aukera dutenean, ez dute onartzen administrazioak azpikontratutako zerbitzuakaz duten erantzukizuna".

Azaroaren 29an, langileak enpresagaz bilduko dira negoziatzeko. Gorlizko Udalari ere dei egin diote bilkura horretan parte hartzeko, baina deitoratu dutenez, alkatetzaren erantzuna ezezkoa izan da. "Udal inplikaziorik gabe ez da konponbiderik egongo", aldarrikatu dute beharginek. 

Erlazionatuak

Gorlizko laberintoa

Erabiltzailearen aurpegia Erandio

Gorlizko eskolan garbitzaileen grebaren ondorioz 170 egun daramate zikinkeri artean. Guraso eta irakasleek protesta egiten duten arren, momentuz eg...
Gorlizko ikastetxea garbiketa-zerbitzurik gabe dago ikasturtea hasi zenetik

Gorliz

Gorlizko Udalak azpikontratutako garbiketa-zerbitzuko langileak greban daude, eta, horren ondorioz, ikasgeletako egoera "jasanezina" dela salatu du...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun