2019ean, Gorlizko emakume udaltzaingo batek tratu iraingarria eta sexu izaerako jokabide desegoki larriak sufritu zituela salatu zuen bere kidea zen gizonezko batengatik. Horren ondorioz, 2021an baja eskatu zuen. Duela egun gutxi, artxibatu egin dute emakumeak bere kideari jarritako denuntzia.
Beharginek nabarmendu dute auzibidean frogatutzat eman direla emakumezko lankide horrek gizonezko beste lankide baten partetik jasandako gertakari batzuk. Hala, nahiz eta epaileak erabaki duen frogatutzat eman diren gertakari horiek ez direla penalki zigorgarriak, ikusarazi dute ez duela "esan egoera horiek eman ez zirenik".
Hala, langileek Gorlizko Udalari eskatu diote prebentzioan eta langileen formakuntza feministarako plan bat egitea eta aurrera eramatea. Bestetik, erasotua izan den langilea babesteko dagozkion neurriak ezartzea ere exijitu dute, "egiaztatutako gertaera horiei dagokien diziplina espedientea ireki eta bidezko neurriak hartzeko erasotzailearekiko".
Hala, argi adierazi dute haiek euren partetik erasotua izan den lankidea babesten jarraituko dutela, baita lantokia pertsona guztiontzat espazio segurua izateko neurriak exijitzen ere.
