Gorlizko Udalak aire zabaleko kirolgune berria sortu du Ondargana parkean, kalistenia gunea eta aparatu biosasungarriak uztartuta. Jarduketak 48.333,40 euroko inbertsioa izan du, Urbabil 2000 S.L. enpresak egin ditu lanak, eta Udalak azaldu duenez, helburua da jarduera fisikoa, bizi-ohitura osasungarriak eta belaunaldi arteko erabilera sustatzea.

Getxoko Udalak eta Elhuyarrek Bizilabe eskolaz kanpoko ekintza jarriko dute martxan datorren ikasturtean, Lehen Hezkuntzako 5. eta 6. mailetako gazteentzat. Ekimenaren helburua da 10 eta 12 urte arteko gazteek zientzia, teknologia, esperimentazioa eta sormen teknologikoa euskaraz lantzea, modu praktiko, dibertigarri eta erakargarrian, genero ikuspegia ere txertatuta.