"2012ko abenduan ikerketa batzordea abian jarri genuenean, gaia udal batzarrean konpondu behar zela esan genuen, auzitegiek hartzen duten erabakiei kalte egin barik; eta horrela egin dugu", aipatu zuen PSEko bozeramaileak. Hain zuzen ere, azaroaren 11ko osoko bilkuran, Pinosoko ikerketa-batzordea itxitzat eman zuten, EH Bilduren, PSEren era PPren botoez. Ustezko irregulartasunak "frogatutzat" eman zituzten oposizioko alderdiek: kiroldegiko proiektua lehiaketa publikora atera baino lehen, Arcain enpresagaz elkarlanean ibili ei ziren aurreko alkate Eneko Arruebarrena eta Jon Loizaga zinegotzi ohia, ondorioztatu zutenez. Orduan Udal Gobernua osatzen zuten EAJk eta Ezker Batuak, ostera, sutsuki defendatu zuten agintarien "errugabetasuna". Zortzi hilabete geroago, Udal Gobernua osatzeko hitzarmena izenpetu dute EAJk eta PSEk.
Etika Publikorako Batzordea
Bestalde, Eusko Legebiltzarreko EH Bilduk "penagarritzat" jo du Jaurlaritzaren Etika Publikorako Batzordeak Arruebarrena Pinosolo auzian izandako ustezko ardurak aztertzeari uko egin izana. Koalizio abertzalearen ustez, aipatutako batzordeak "inplizituki babestu du" udal agintari izandakoa Metro Bilbao garraio enpresako kudeatzaile postuan jarraitzea.