2014ko azaroaren 28an, Javier Ruiz Bizkaiko PPko idazkari nagusiak aurkeztu zuen Arruebarrena eta Loizagaren kontrako salaketa, Pinosoloko kiroldegiko eraikuntza-lanak esleitzeko orduan irregulartasunak egon zirelakoan.
"Leioak ez du jakingo benetan zer gertatu den Pinosolo auzian. Hala ere, fiskalaren idazkia irakurri ondoren ikusi dugu nola EH Bildu Leioan mahai gainean jarri izan dituen irregulartasun zantzuak eta datuak zuzenak eta oinarrituak izan direla. Berez fiskala bere idazkian horietan oinarritzen ditu bere azalpen asko. Zoritxarrez ikerketak ez du aurrera joko", azaldu du Leioako EH Bilduk, urgentziaz egindako balorazioan. Halaber, EAJk egindako "hotsandiko balorazioa tokiz kanpo" dagoela adierazi du koalizio abertzaleak.
Jelkideen iritziz, "zentzurik eta arrazoirik gabeko salaketak izan dira, zeintzuetan PP eta EH Bildu elkarrekin joan diren, inolako lotsarik gabe, EAJk irabazi duen izen eta ospe ona zikintzeko asmo argiarekin". Gauzak horrela, BBBk alderdi biei eskatu die "arrazoirik gabe eta asmo txarrez eginiko salaketak aurkezteari utz diezaiotela".
Leioako EH Bilduren ustez, ostera, EAJ pozik dago "preskripzioaren ondorioz bere bi kargu publikok ikerketa saihestu duelako". "Hala ere, berri hau ez da bat ere ona leioaztarrentzat, ezta euskal gizartearentzat ete. Berriro ere, ustelkeriak eta irregulartasunek preskripzioan topatu dute aliaturik onena", dio koalizioak. Urgentziazko balorazio honen ostean, hurrengo egunetan sakoneko balorazio bat publiko egingo du Leioako EH Bilduk.