Leioako IAk joan den eguaztenean abiatu zituen ikasleen kontrako erasoak salatzeko mobilizazioak. Egun horretan ere errepidea moztu zuten. Apirilaren 26an, martitzena, berriz, manifestazioa abiatuko da Mikel Laboatik, 11:50ean.
Izan ere, Ikasle Abertzaleak (IA) taldearen arabera, Euskal Herriko Unibertsitateak (EHU) jarritako ikasleen aurkako diziplina-espedienteak eta salaketak areagotu egin ziren martxoan. Gauzak horrela, bost eskaera egin dizkiote unibertsitateko arduradunei: San Mameseko ikasleei diziplinazko espedientea ez irekitzea; Gasteizko ikasleen kontrako salaketak eta gainontzeko neurriak atzera botatzea; Leioako ikasle inputatuaren aferan esku hartu eta bere egoera konpontzea; EHUra Ertzaintza sar ez dadin behin-betiko neurriak hartzea; eta campusetan dauden "indar polizialak" kanporatzea.
Gaurko Errektoretzak eskaera horien betetzeko bermeak jarri ezean, "hainbat egunetan Leioako jarduna beranduago hasiko zela" iragarri zuen Leioako IAk.