Leioan daborduko dena dago prest Umore Azokaren edizio handienetariko bati hasiera emateko. Leioako Udalaren Kultura Sailak antolatuta, Eusko Jaurlaritzaren eta Bizkaiko Foru Aldundiaren laguntzagaz batera, azoka bihar arratsaldean, maiatzaren 19an, hasiko da eta lau egun iraungo ditu, domeka eguerdian, maiatzaren 22an, amaitu arte. Ordurako, gonbidatuak izan diren 40 konpainiak 90 emanaldi eskainiko dituzte, udalerriko 18 gunetan banatuta. Lotura honetan dago hurrengo lau egunetan Leioan egongo diren ikuskizun guztien egitaraua.
Aurreko bi edizioetan dataz aldatu ondoren, irailean ospatu baitzen, Euskal Herriko Kale-artisten Azoka nagusia, espainiar Estatu-mailan garrantzitsuenetarikoa, inoiz baino indar gehiagogaz bueltatu dela azpimarratu dute antolatzaileek. Hala, Euskal Herriko 19 konpainiak, Espainiako Estatuko 16k eta nazioarteko bost taldek euren azkeneko obren estreinaldiak eskainiko dituzte.
Programa paraleloa
Umore Azokaren beste parte garrantzitsu bat da kale-artisten sektorea dinamizatzea, horregatik, Leioatik 220 profesional inguru igarotzea espero dute antolatzaileek. Horretarako, beren gune propioak izango dituzte harremanetan jartzeko, erakundeen bilerak eta batzarrak antolatuko dituzte, eta plataforma eta ekimen berriak aurkeztuko dituzte. Esparru horren baitan, hainbat saio prestatuko dituzte konpainiek beren sorkuntza-obren proiektu berriak programatzaileei erakutsi diezaieten, hurrengo denboraldirako prestatzen ari direnaren aurrerapen gisa.
Horretaz gain, beti bezala, bariku eguerdian Mendibile Jauregian Harrera Ofiziala egingo dute, eta 2019ko Umore Azokako sariak eta 2022ko Umore Azokako Sari Berezia banatuko dituzte. 2019ko sariak ezin izan zituzten banatu hurrengo edizioan bertan behera geratu baitzen, ezta iazko edizioan ere, harrera-ekitaldia ez zen egin-eta.
