Las Vegas auzo ondoko zaborra batzeko kamioien biltegia lekualdatuko dute

Etxebizitzetatik metro gutxira dagoen zaborra batzeko kamioien biltegia. © IPARRAGIRRE ZEHARKALEA AUZO-ELKARTEA

Iparragirre zeharkaleko etxebizitzetatik metro gutxira dagoen hiri-hondakinak biltzeko ibilgailuen gordelekua lekualdatzeko higiezin bat alokatzen kontratazio espedientea abiatzea onartu du Udalak. Duela urte bat baino gehiago iragarri zuten gordelekua lekualdatuko zuela, baina ordutik ez da bestelako jakinarazpenik egon.

EH Bilduk jakitera eman duenez, Leioako Udalak fitxa mugitu du eta Iparragirre zeharkaleko etxebizitzetatik metro gutxira dagoen biltegia lekualdatuko dute. Las Vegas auzoko bizilagunek hori eskatzeko hainbat protesta eta salaketa egin dituzte azkenaldian, gune horrek eragiten dizkien eragozpenenak salatzeko.

Besteak beste, auzotarrek salatu dute euren etxebizitzetatik metro gutxitara dagoen gune horretatik ateratzen zen kiratsa eta makinen zarata etengabea dela: "Goizaldean martxan jartzen diren kamioen zaratak eta horietatik datorren usainak ere kaltetzen ditu bizilagunak".

Aurreko 2022ko otsailean, Mikel Abascal hirigintza arloko arduradunak Lurralde Batzordean jakinarazi zuen Leioako udal-gobernuak kamioien biltegia lekualdatuko zuela. Ordutik ez da gai horren inguruko albisterik egon, baina bizilagunek eragozpenak salatzen jarraitu dute deitoratu baitute ordutik Udalak ez duela agindutakoa bete.

Orain, Eh Bilduren arabera, Leioako Udalak gordelekua aldatzeko alokairu bat ezarriko du behin behineko neurri gisa. Hala ere, koalizio abertzaleko ordezkariek urrats bat gehiago ematea eskatu dute eta hurrengo HAPOan premia hori aurreikusten duen eta osasun publikoaren ikuspegitik egokienak diren lurzoruak identifikatzea defendatu dute.

Zehapen-espedienteak Burger King jatetxeari

Era berean, EH Bilduk jakitera eman duenez, Las Vegaseko bizilagunen salaketa publikoaren eta alderdi soberanistaren ekimen instituzionalaren ondoren, auzunearen ondoan dagoen Burger Kingari bi zehapen-espediente irekitzea lortu dute, aste-akabuetan goizeko 06:00ak arte irekitzeagatik. Zentzu horretan, gobernu-taldeari eskatu diote, ordutegiak errespetatu ezean, neurri zorrotzagoan har ditzatela, Las Vegaseko bizilagunen atsedenerako eskubidea bermatzeko.

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun