Eskualdeko beste udalerri batzuk bezala, aurten ere, Leioak ere bat egingo du irailaren 16tik 22ra egingo den 2023ko Mugikortasunaren Europako Asteagaz. Horretarako antolatutako jarduerak zapatuan, hilak 16, hasiko dira XIX. Oinezkoen Pausora topagune osasungarri eta dibertigarriagaz.
Aurten, "Leioak hunkitu egiten du!" lelopean egingo dute martxa, edizio honetako berrikuntzetako bati erreferentzia eginez; izan ere, kartografia emozionala deritzon jokoa egingo dute hiria zaintzearen, bizitzearen eta sentitzearen garrantziaz ohartarazteko. Horretarako, parte-hartzaileak ibilbidean seinalatutako lau puntutan –Mendibilen, Pinosolon, Ondizen eta Umeen Kontseiluan– geldituko dira, gune horiek sentiarazten dietenaren garrantziaz hausnartzeko. Martxa 11:00etan abiatuko da, Sakonetako Kiroldegitik, baina, ohi bezala, abiapuntura denbora nahikoagaz iristea gomendatu dute.
Eskola Bideak
Irailaren 22an, barikua, urtero bezala, eta Mugikortasunaren Europako Astearen testuinguruan, Haur Ibiltarien Topaketa egingo dute Errekalde plazan, 10:00etatik aurrera. Eskola Bideak deritzon proiektuan parte hartzen duten hiriko ikastetxeetako Lehen Hezkuntzako 4. mailako ikasleen arteko topaketa da ekimen hau.
Eskola Bideak Leioako adingabeak beren ikastetxeetara oinez joan ahal izateko pentsatu, zaindu eta berrikusita dauden ibilbide-sarea da. Artatza, San Bartolome, Txomin Aresti, Mercedarias, Betiko eta Irlandesaseko 225 ikaslek hartuko dute parte, eta, joko ezberdinen bidez, proiektua hobetzeko gomendioak edo proposamenak egiteko aukera izango dute.
Iban Rodriguez Leioako alkateak nabarmendu duenez, "ziur gaude lagunekin eskolara oinez joateak onura handiak dituela haurrentzat; osasunerako, sedentarismoa eta autoaren erabilera murrizteko, harreman eta sozializaziorako, sare edo lotura komunitarioak sortzeko, besteak beste".
Halaber, jarduera hori bat dator Autorik gabeko Egunagaz, eta eguneroko bizitzan ibilgailu pribatuaren erabilera arrazionala sustatzeko eta oinezkoentzako lekua berreskuratzeko asmoz, Avanzadako alboetako ibilgailuen zirkulazioa etengo dute, eskola-umeak elkartzen diren bitartean, 09:00etatik 12:30era.
