Guztira, 27 estreinaldi hartuko ditu gaur bertan hasiko den Umore Azokak: estatuko 20 eta nazioarteko zazpi. Ikuskizunak hainbat diziplinatakoak izango dira, hala nola, dantza, antzerkia, clowna, musika, performancea, zirkua, txotxongiloak, instalazioa, ikusizko arteak eta magia.
Bertaratuko diren konpainiak Andaluzia, Asturias, Katalunia, Euskal Herria, Galizia, Murtzia eta Valentziatik etorriko dira; horiez gain, nazioarteko hainbat ere etorriko dira beraien ikuskizunak eskaintzera: Portugal, Frantzia, Suitza, Italia, Irlanda, Belgika eta Mexikotik.
Gainera, Umore Azokak urtero Leioako konpainia bat ere hartzen du, eta aurtengo edizioak Mutis Espazioaren Gorputzen Bulkada proposamena izango du.
Familia guztiarentzako proposamenak
Kategoria guztien artean, haurrei zuzendutako zazpi emanaldi familiarrak nabarmendu daitezke, horietatik lau euskal konpainienak izanik. Horrez gain, publiko guztientzat katalogatuta dauden beste 28 bat proposamenetaz gozatu ahal izango da ere, baina ikuskizun hauen ordutegia dela eta, ezin dira familiarrak diren ikuskizunen kalifikazioan sartu.
Familientzat zuzenduta dauden emanaldiak Umore Azoka izango den lau egunetan zehar izango dira eta Hika Teatroa (Euskadi), La Pez (Euskadi), Markeliñe (Euskadi), Cía. Trotamundos (Euskadi), Cía. Artilugio (Andaluzia), Tetês de Mules (Frantzia) eta Cie Balancetoi; Maleta Company (Belgika) konpainien eskutik datoz.
600 proposamen baino gehiago
Aurtengo Umore Azokak izango dituen ikuskizunak 600 proposamen baino gehiagoren artean aukeratu dituzte, antolatzaileen hitzetan, jaialdiaren historian inoiz izan den parte-hartzerik handiena izanik.
Agertokiei dagokienez, Umore Azoka 2024k 15 gune-eszeniko nagusi izango ditu, eta horiek, era berean, 30 kokaleku eszeniko ingurutan banatuta egongo dira. Guztiak udalerriaren erdigunean egongo dira, joan-etorriak azkar eta modu eroso batean egin ahal izateko.
15 gune horietatik gehien nabarmentzen dena Umeen Kontseiluaren parkea da. Bertan El jardín de las delicias izeneko irudi eta soinu instalazioa egongo da. Maiatzaren 17an eta 18an egongo dena ikusgai, 21:30etik aurrera, publiko guztientzarako zuzendutako antzerkia.
