Leioako Udalak eztabaida- eta hausnarketa-saio bi egingo dituela iragarri du, eta herritarrei horietan parte hartzeko deia egin die, udalerrian euskararen etorkizuna zehazteko. Euskara Sustatzeko Plana sortzearen baitan, Udalak topaketa ireki horiek antolatuko ditu azaroaren 7an eta 28an Kultur Leioan 18:00etatik aurrera. Lehenengoan, euskarak Leioan bizi duen egoera aztertuko dute, eta bigarrenean, berriz, plan berri horrek datozen urteetan euskararen erabilera indartzeko izango dituen erronkak aztertuko dituzte.
Saio hauetan parte hartzeko beharrezkoa izango da aldez aurretik izena ematea Udal Euskara Zerbitzura deituz edo euskarazerbitzua@leioa.eus helbidera mezu elektroniko bat bidaliz. Egitasmoaren helburua da datozen 10 urteetarako, 2034ra arte, estrategiak eta proiektuak zehaztea, pertsona euskaldun aktibo eta ahaldunduen komunitatea sustatzeko, eguneroko bizitzan bizikidetza eta euskararen erabilera bultzatuko dituen testuinguru eleaniztunean.
Prozesu hori Leioako euskararen egoeraren diagnostiko bategaz hasi zen, eta horretarako herritarren iritziak bildu zituzten formulario baten bidez. Saio horien bidez, Udalak plana herritarren ideiakaz eta itxaropenakaz aberastu gura du, komunitateak Leioa euskaldunago baten eraikuntzan aktiboki parte har dezan ahalbidetuz.
