Alde batetik, jaien programari dagokionez, Errekalde plaza umeentzako jardueren epizentroa izango da: pintura-tailerrak, musika eta magia ikuskizunak, ur-puzgarriak, apar-festak eta beste hainbat ekintza eskainiko dituzte bertan. Kultur eta kirol jarduerek ere presentzia handia izango dute: pilota jaialdia, soka-tira, eskubaloi partidak edo Euskal Kirolaren Gala izango dira horietako batzuk.
Euskal kultura jaietako beste zutabe nagusietako bat izango dela ere iragarri du Udalak, Aurreskua elizatea edo dantza alardea bezalako proposamenakaz, besteak beste, tradizioak adin guztietara hurbilduko dituztenak.
era berean, ekainaren 18an eta 24an, gainera, Haurren Eguna ospatuko da barraketan, prezio bereziakaz.
Beste aldetik, segurtasunari dagokionez, kontrol prebentiboak ugarituko dira, eta presentzia poliziala areagotuko dute jai-guneetan eta inguruko puntu estrategikoetan. Objektu arriskutsuak detektatu eta galarazteko neurriak hartuko dira, eta alkoholaren eta drogen kale-kontsumoa saihesteko kontrol bereziak ere egingo dituzte metro eta autobus geltokietan. Halaber, kale-zurruta ohiko guneetan argiztapena indartuko da, eta adingabeen babesa lehenetsiko dute.
Leioako Udalak herritarrei eta familiei dei egiten die jaiak arduraz, errespetuz eta elkar zainduz bizitzeko, guztientzako jai seguru eta dibertigarriak izan daitezen.
