Subflubiala Ez plataformatik kritikatu dute proiektu honek "milaka kotxe gehiago" ipiniko dituela errepideetan, kutsadura eta berotegi efektuko gasen handiatzeagaz batera. Halaber, proiektuak suposatuko duen gastu publikoa kritikatu dute: 500 miloi baino gehiago, alegia.
"Kaltetu nagusiak inguruko ikastetxeak izango dira, ikasle zein langileen osasunean kalte larriak jasango baitituzte. Ekainean lau ikastetxek, Artatza-Romo institutua, Betiko Ikastola eta Romo eta Artaza eskolak, komunikatu bat atera zuten Subflubialaren proiektua bertan behera gelditzea eskatuz", azaldu dute.
Gainera, Artaza parkean hamarnaka zuhaitz ebakiko dituzte eta parkearen laurden bat itxita egongo da obrek iraun bitartean. "Bere gainean egingo duten zubibideak Galindo errekaren ekosisteman eragin negatiboak izango ditu, babestuta dagoen arrain hiruarantza (Gasterosteus aculeatus) arriskuan jarriz".
Horregatik, Subflubiala Ez taldeak jendea animatu gura du proiektu honen aurka posizionatzeko eta urriaren 18an Bilbon egingo duten manifestaziora batzeko.
