Iparragirre kalea asfaltatzeko lanakaz amaitutzat eman dituzte errepidea berritzeko lanak, eta, iragarri dutenez, eguaztenean bukatuko dituzte estaldura eraikitzeko lan guztiak. Guztira 65,2 milioi euroko aurrekontua izan duen proiektu honek zarata nabarmen murrizteko helburua izan du, eta Aldundiaren arabera, batez bestekoa 77 dezibelioetatik 51 dezibelioetara jaistea lortu dute. Hain zuzen ere, lanen aurretik, errepidearen inguruko 6.000 bizilagun inguruk jasaten zuten zarata etengabea, eta horietatik 2.800ek etengabeko zarataren maila altua jasaten zuten.
Horregaz batera, tunelean zirkulazio segurua eta arina bermatzeko neurriak ere hartu dituzte, hala nola argiteria hobetu dute eta gehieneko abiadura orduko 80 kilometrotik 60ra jaitsi dute estalitako tartean. Hiri-bilbean, berriz, abiadura orduko 30 kilometrokoa izango da.
Era berean, irailean zehar, Aldundiak azken probak egin zituen tunelaren barruan zirkulazioaren segurtasuna bermatzeko sistema guztiak martxan jartzeko. Horien artean, istripuak automatikoki detektatzeko sistemak eta suteak itzaltzeko instalazio aurreratuak daude.
Kondentsazioa saihesteko neurriak
Horrez gain, hasieran kontuan hartu ez zuten ezusteko bat ere azaldu da: kondentsazioa. Foru Aldundiak iragarri du neurri bereziak aplikatuko dituela euri-egunetan ibilgailuen kristalak eta atzerako ispiluak lausotzea saihesteko. Izan ere, tunelaren estutasunak, trafiko handiak eta malda txikiak hezetasuna eragiten dutela azaldu dute Aldundiko iturriek. Hori dela eta, "aireztapen behartuaren pauta" bat ezarriko dute galerian, hezetasun-maila murrizteko.
Bestalde, ebakuaziorako 11 galeria gaitu dituzte, eta irailaren 30ean istripu-simulakro bat ere egin zuten, erakunde arduradunek gertakari larri baten kasuan emandako erantzuna baliozkotzeko.
Bulebar berritua
Orain arte udalerria banatzen zuen lubaki zaharreko 900 metro estaltzearen ondorioz, 12.000 metro koadro berri sartu dira hiri-bilbean, eta bizilagunentzako daborduko erabilgarri daudenak.
Hala, 18.000 metro koadroko bulebar berria sortu dute, 620 metroko luzera duena, oinezkoentzako ibilbideak, egonlekuak eta aisialdirako guneak eskaintzen dituena, eta 19.000 metro koadro berdegune jarri dituzte. Bidegorri bat ere badu, inguruko sareagaz lotuta dagoena.
Gainazalean egindako hobekuntzen artean, 17.000 metro koadro errepide ezarri dituzte, biribilgune berri bi eraiki dituzte eta Iparragirre kaleko espaloia 2,5 metroko zabalerara handitu dute irisgarritasun osoa bermatzeko.
Azkenik, trafikoaren zarata arintzeko, tuneleko ahoetan 4.000 metro koadroko pantaila akustikoak jarri dituzte, eta tuneletako estalkiaren gainean zelula fotovoltaikoak instalatu ditutze, tuneleko sistemak energetikoki hornitzeko.
