"Lemoizko itsaslabarrak naturagune babestua, orain da garaia" proposamena aurkeztuko du Etzandarri taldeak Eusko Legebiltzarrean

Etzandarri taldeak proposatutako ibilbide-sarea.

Lemoizko itsaslabarrak natur-gune gisa babesteko eta ibilbide-sare bat egiteko proposamena aurkeztuko du bihar, abenduaren 15ean, Etzandarri euskal mendi-taldeak Eusko Legebiltzarrean, EH Bilduk gonbidatuta.

Bihar, abenduaren 15ean, EH Bilduk gonbidatuta, "Lemoizko itsaslabarrak naturagune babestua, orain da garaia" proposamena aurkeztuko du Etzandarri euskal mendi-taldeak Eusko Legebiltzarrean, Jasangarritasun, Ingurumen eta Ingurune Naturalaren Batzordean, hain zuzen ere. Iosu Alberdi taldeko kideak azaldu duenez, proposamen horrek ingurune horretan ibilbide-sare bat egitea aurreikusten du, baita natura-gune hori babestu ere. Izan ere, dioenez, Lemoizko zentral nuklearraren lur-eremua da babestu gura dutena, eta bertan kokatu gura dituzte ibilbideotarako harrera-guneak, atseden-lekuak eta aparkalekuak, "abandonatuta dauden azpiegitura horiek aprobetxatuta", hain zuzen ere.

Dena dela, azpimarratu duenez, proiektuak Lemoizko itsasertz osoa hartzen du, Etzandarri mendiko puntatik Usategira arte; baita zentral nuklearreko lur-eremu guztia ere, Urbieta urtegia eta Martzaga auzoa barne. Naturagune horrek dituen balio ikaragarriak konbentziturik, proposamena landu eta daborduko hainbat erakunde eta alderdi politikoei helarazi diete, hala nola Lemoizko Udala, Lemoizko EAJ eta EH Bildu taldeak; PSE, Elkarrekin Podemos, EAJ eta EH Bildu alderdiak, Bizkaiko Ahaldun Nagusia laguntzeko Unitatea, Bizkaiko Foru Aldundiko Iraunkortasuna eta Ingurune Naturala Zaintzeko Saila, Bizkaiko Foru Aldundiko Nekazaritza zuzendaritza, Jata-Ondo garapenerako agentzia, Ekonomiaren Garapena, Jasangarritasuna eta Ingurumenaren Saila, Nekazaritzako, Arrantzako eta Elikagai politikako sailburuordetza, Arrantza eta Akuikultura zuzendaritza, eta Landa eta Itsasertzaren Garapeneko eta Europar Politiketako zuzendaritza.

Urte berriagaz batera, COVID-19ari aurre egiteko osasun-neurriak malgutzen direnean, proposamena zuzen-zuzenean ezagutarazteko ibilbideak egingo dituztela iragarri dute Etzandarri taldekoek.

Erlazionatuak

Lemoizko itsaslabarrak, naturagune babestua. Orain da garaia!

Lemoiz

Bai, orain da garaia. Heldu da hango eta hemengo administrazioek Lemoiz herriarekin eta bere naturaguneekin daukaten zorra kitatzeko ordua. Lemoiz ...
"Oso kezkatuta gaude euskarak Lemoizen bizi duen egoerarekin; horregatik sortu genuen taldea"

Lemoiz

Udalerrian ume eta gaztetxoen artean euskararen erabilera bultzatu guran, Etzandarri euskal mendi-taldea sortu zuten duela 5 urte Lemoizen. Urteota...
Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun