Koalizio abertzaleak gogoratu duenez, Plentziako obrak martxoaren 30ean hasi ziren, eta Urdulizen apirilaren 2an. Euren aburuz, “pentsaezina da hiru egunetan autobusentzako bidea egin daitekeenik”. Bizkaibus eta ordezko zerbitzuak apirilaren 8an hasi ziren geltoki inguruko bidea erabiltzen, “oraindik lanak amaitu gabe zeudela”. Horrez gainera, Kosta Mugapeak metro geltokiaren inguruko lanak eten eta BGPari isuna jarri ziola jakinarazi dute EH Bildukoek, obrak egiteko beharrezko baimenak ez zituelako eskatu.
Era berean, hainbat kolektibok ere kexa adierazi dute obrak eragin dizkien kalteengatik, hala nola taxistak, toki “desegokira” aldatzera behartu dituztelako; eta Gorlizko ospitaleko langileak, gaueko azken bidaia ezabatu izanagatik.
“BGPak autobus esleipenak modu traketsean egin ditu”, salatu du koalizioak, eta bidaiarien beharrei aurre egiteko autobus kopurua bikoizteko beharra jarri dute adibidetzat.
Horren aurrean, EH Bilduk azalpenak eskatu dizkio Bizkaiko Foru Aldundiari eta Bizkaiko Garraio Partzuergoari, “nahaste borraste honen erantzule direnek egoera aztertu behar dute eta arazoari aurre egiteko neurriak hartu behar dituzte berehala”. Arazo horiek guztiak koordinazio eta planifikazio faltaren ondorio direla uste dute EH Bildukoek. Zentzu horretan, Garraio Autoritate Bakar baten sorrera eskatu dute azken lau urteotan, “Garraio Autoritate Bakarrak halako lanen koordinazioa erraztuko luke eta gisa honetako obrak elkarlanean egitea ahalbidetuko luke, bidaiariei eta hainbat kolektibori sortu zaizkien arazoak ekidinez”.
