Batzar hori Kosta eta Itsasoko Sostengarritasunerako Zuzendaritza Nagusiagaz urrian izandako hartu-emanen hurrengo pausoa da. Plentziako ordezkaritzaren asmoa da "futbol-zelaiaren egoerak sortzen duen arazoa ikustaraztea" eta "Errotabarriko kirolgunea herriarentzat zein garrantzitsua den ulertaraztea", esleipena arintzeko asmoz. Udal Gobernuak bilera hori baliatuko du Plentziarentzat "garrantzitsuak" diren beste gai batzuk jorratzeko ere, nahiz eta zer gaiak diren ez duen aurreratu.
Udan egin beharrekoak ziren Errotabarri konpontzeko lanak, aurretik udalerriko hiru indar politikoek, klubak eta teknikoek sortutako batzordeak erabaki legez, baina Aldundiaren eta jaurlaritzaren baimen ezberdinak lortu ostean, Espainiako Ingurumen Ministerioagaz topo egin zuen Udalak. Bere baimena barik obrarik ezin izango lukeenez egin, irailaren bukaeran Plentziak bilera eskatu zion Ministerioari eta Kosta Zuzendaritzagaz hainbat jarduera izan du.
Liga abiatu zenetik Plentzia Kirol Elkarteko taldeak inguruko udalerrietako futbol-zelaietan jokatzen dabiltza. Gorka Zuazo Plentziako presidenteak hainbatetan eskertu du laguntza hori baina kontzientea da egoeraren anormaltasunaz eta denek egiten duten ahaleginaz: "ezin dugu erbestean luzaroan jarraitu".
