Ekologistak Martxanek "bandera beltza" eman dio Plentziako itsasadarra berrantolatzeko proiektuari

Ekologistak Martxan taldeak urtero argitaratzen du Bandera Beltzak txostena, Espainiako Estatuko itsasertzean dauden ingurumen-arazoak edota proiektu suntsitzaileak salatzeko. Aurtengoan, Bizkaiko "sarietako" bat Plentziako itsasadarra berrantolatzeko Jaurlaritzaren egitasmoak eroan du. Proiektua geroratuta dago, momentuz.

"200 pantalan inguru jartzea ahalbidetzen duen dragatze bati aurre egin beharko dio Bizkaiko kostaldeko itsasadar horrek", dio Ekologistak Martxanek bidalitako prentsa-oharrak; "horrek 15.000 metro koadroko azalera kenduko dio estuarioari eta 10.000 portuari, hau da, lan horrek Plentziako itsasadarraren ekosisteman eragin argiak izango lituzke".

Ekologisten berbetan, inguru horretan oso nabarmena da honezkero gizakion jardunaren eragina, eta proiektuak aurrera egiteak are nabarmenago egin eta ekosisteman are kalte gehiago sortuko luke. "Bestalde, proiektuak egiturazko gabezia asko ditu", gaineratu dute, "eta, izan ere, SOS Itsasadarra plataforman elkartutako herritarrak eta tokiko eta eskualdeko taldeak ez daude batere ados".

Jaurlaritzaren itsasertzerako politika orokor desegoki baten testuinguruan (aparkalekuak egin, kirol-portuak zabaldu...) kokatzen du Ekologistak Martxanek Plentziako proiektua ere. EAJren ikuspegia, izan ere,  "epe laburrekoa eta ekonomizista" dela azpimarratu dute. "Ez da harritzekoa Eusko Jaurlaritzak atzeratu izana, oposizioko talde guztiak azterketa adostuago bat egiteko geldiaraztea eskatu ondoren".

Azken urteen laburpena egin dute

Aurten hamabost urte bete ditu Bandera beltzak txostenak. Hori dela eta, azken sei urteotako egoera biltzen duen txosten gehigarria argitaratu dute. Iaz ere, hain zuzen, Uribe Kostari egokitu zitzaion Bizkaiko banderetako bat, Getxoko gurutzaontzien kaiaren eraikuntzari eman zioten eta.

Erlazionatuak

Eusko Jaurlaritzak Plentziako itsasadarra berrantolatzeko proiektua atzeratu du

Plentzia

Atzerapen horregaz, ideia da orain arte jasotako eta hemendik aurrera jasoko dituzten ekarpenak kontuan hartuta, horiek ikertu eta, ahal izatekotan...
Zenbat ontzi kabitzen dira itsasadar batean?

Plentzia

Unai Brea HIRUKAko kazetariak Plentziako itsasadarraren berrantolaketaz Bizkaia Irratian egindako kolaborazioa entzun dezakezue hemen.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun