“Langile guztiei egin beharreko proba diagnostikoak egin ondoren, eta, gure langileei zein bezeroei osasun-segurtasuna bermatzeko, eraikin osoa birus desinfektatzaile homologatuekin garbitu eta desinfektatu ondoren" zabaldu zuten atzo berriro Casa de Marinos, astebetetik gora itxita egon ostean.
Itsasadarraren ertzeko hotel biek ohiko jarduna errekuperatzea nabarmendu du Plentziako Udalak, turismoaren egoera baloratzeko plazaratutako prentsa-oharrean. Adierazi dutenez, "bisitatzen gaituzten pertsonen profila aldatu da, orain hurbilagoko turistak dira, baina udalerrian denbora gehiago ematen dute eta interes berezia dute historia, gastronomia eta gure ingurunea ezagutzeko".
Bestalde, positiboki baloratu dituzte udako lehen emaitzak turismo-jarduerari dagokionez: "Eskertzen dugu turismo-enpresek, ostalaritzak eta merkataritzak errealitate berri honetara egokitzeko egin duten lan garrantzitsua, bisitatzen gaituztenei kalitate oso handiko turismo-eskaintza eskainiz".
Plentzia, Turismo Bulegoen Euskal Sarean
Ekainean zabaldu zuten jendearentzat turismo-bulegoa, pandemiaren ondorioz aldi batez itxita egon ostean. Bisitarientzako arreta-zerbitzua egokitu dute, edukiera mugatuz, babes-elementuak gehituz eta pantaila bidezko arreta emanez. Gainera, azaldu dutenez, uztailaren 1etik Turismo Bulegoen Euskal Sarearen (Itourbask) barruan dago bulegoa. "Plentzia izan da azken urteotan sare horretan sartu ez den Uribe Kostako herri bakarra", gaineratu dute.
