Oraindik lau urte falta dira Errotabarriko futbol-zelaiaren kontzesioa bukatzeko, hala ere, daborduko, EH Bilduk kirol-instalazioen behin betiko kudeaketa Plentziako Udalaren eskuetara pasa dadin lanetan dabil. Hala, bihar, hilak 28, Espainiako Senatuko Trantsizio Ekologikorako Batzordean lur horien inguruko mozioa eztabaidatuko dute Plentziako Udalaren jabetzara pasa daitezen.
Plentziako koalizio abertzaleko kideek jakinarazi dutenez, azken urteotan S.D. Plentzia elkarteko zuzendaritzagaz koordinatuta hainbat irtenbide baloratu dituzte, tartean, Arpillaoko inguruan futbol-zelai bat eraikitzeko aukera ere: "Hori izan zitekeen instalazio mota hori hartzeko baldintzak bete zitzakeen lursail bakarrenetako bat. Esan beharra dago ondorioak argiak eta laburrak direla, eta, besteak beste, hirigintza- eta ekonomia-arrazoiengatik ezetsi dela aukera hori".
Azaldu dute 2021ean Idurre Bideguren EH Bilduko senataria S.D. Plentziako zuzendaritzagaz elkartu zela Errotabarriren egoera bertatik bertara ezagutzeko. Ildo horretan, Estatuko Idazkaritzari kontzesioa luzatzeko asmorik ote zuen galdetu zioten, baina ez zieten ezer argitu. Horren harira, 2021eko eta 2022ko Estatuko Aurrekontu Orokorretan Errotabarriren egoera mahai gainean jarri zuten, eta, aldi berean, 2022ko otsailean bihar eztabaidatuko den mozioa erregistratu zuten. Jakinarazi dute saioa zuzenean online jarraitzeko aukera egongo dela.
Zentzu horretan, Plentziako EH Bilduko ordezkariek azaldu dute orain arte emandako pausoak ez dituztela publiko egin, "itxaropen faltsuak ez sortzeko edo modu oportunistan ez ulertzeko".
#Plentzia|ko Errotabarri zelaia udalari lagatzeko eztabaidatuko da espainiako senatuan, EH Bilduk eskatuta.
— EH Bildu Plentzia (@EHBilduPlentzia) September 26, 2022
Mozioa irailaren 28an bozkatuko da, indar politiko guztien babesa espero dugu. EH Bildu ildo horretan ari da lanean.
Informazio gehiago: https://t.co/fyrb7vBGPr pic.twitter.com/Ou4Gw6paXF
