Espainiako Nekazaritza, Elikadura eta Ingurumen Ministerioak Plentziako Errotabarri futbol-zelaiaren aferan jarrera positiboa hartu du, David Crestelo Plentziako alkateak eguaztenean jakinarazi zuenez. Udal ordezkariak aurreko egunean batu ziren Kosta eta Itsasoko Sostengarritasunerako Itsas eta Lur-eremu Publikorako Azpi-zuzendaritza Nagusiko arduradunakaz, eta epe luzeko konponbidea hitzartu zuten zelai arriskutsurako. Crestelok zehaztu du hitzarmena oraindino ez dagoela sinatuta, baina akordioaren gakoak honakoak dira: Ministerioak Errotabarriko lurrak utziko dizkio Udalari 10 urtez, orain arteko kirol-jarduera gara dadin. Era berean, disuasio-aparkaleku irekia jartzen utziko dio, futbol-zelairako leku egokia bilatu bitartean.
“Egoera berri horrek, akordioa sinatuko den egunetik 10 urtera iraungitze-data izango duenak, eragin du Udal Gobernuak eztabaida ireki dezan”. Eztabaida publiko horretan parte hartu ahal izango dute inplikatutako eragileek zein gura duten auzokide denek. Izan ere, Errotabarrik “inbertsio handiak dakartza, eta horrek udalerriko egunerokoan ondorio asko izan dezake, epe motzean”. Horregatik, elkarlanera deitu du Udalak, behin betiko konponbidea 10 urteko epea amaitu aurretik aurkitzeko.
Plentziako Udalak eskerrak eman dizkie Ministerioko arduradunei erakutsitako "jarrera onagatik eta Errotabarriko eremuan sortu den arazoaren inguruko gure argudioak ulertzeagatik, eta baita ere gure ordezkariei egin dieten harrera onagatik".
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
