Domekan, otsailaren 16an, Plentziako udaletxearen inguruan eta itsasadarraren pasealekuan hondakinak biltzeko auzolana egin zuten, Uribe Kostako Mankomunitateko Jasangarritasun Sailak antolatuta. Antolatzaileek azpimarratu dute ekimenak arrakasta handia izan zuela, 60 pertsona inguru bildu baitziren, horien artean 35 ume. Boluntarioek modu aktiboan parte hartu zuten, eta hondakin ugari jaso zituzten, ingurumenaren zaintzaren garrantziaz jabetuz.
Jarduera horrek amaiera eman zion Ekogunek Uribe Kostako eskoletan garatutako eskualdeko Birzi Taldea kontzientziazio-kanpainari. Horri esker, parte-hartzaileek birziklatzearen garrantziaz jabetzeko aukera izan zuten; izan ere, ekitaldiaren amaieran, bildutako hondakin poltsak udaletxeko plazan sailkatuta erakutsi zituzten, eta ingurumenaren zaintzaren beharra nabarmendu zuten.
Komiki-lehiaketaren irabazleak ere bertan izan ziren. Guztira, 11 ume saritu zituzten: zortzi Plentziakoak (LH 5eko 6 eta LH 6ko 2) eta hiru Sopelakoak. Sari-banaketan Guruzne Carrasson Mankomunitateko lehendakariak, Aitor Garagarza Plentziako alkateak eta Mankomunitateko beste ordezkari batzuk parte hartu zuten, hala nola David Crestelo.
Ekitaldi berezi hori borobiltzeko, ume guztiei eskumuturrekoak eta opariak banatu zizkieten, parte-hartzea eskertzeko eta ekimenaren garrantzia azpimarratzeko.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
