Politika  Sopela 2017-08-07 12:41

Pintaketak egin dituzte berriro Sopelako Herriko Etxean

Pintaketak egin dituzte berriro Sopelako Herriko Etxean 2017ko abuztuaren 5ean, ezezagunek pintaketak egin zituzten berriro Sopelako PSE-EEren egoitzaren kanpoaldean. © BIZKAIKO PSE-EE. | Ikusi handiago | Argazki originala

Sopelako Udaleko Bozeramaileen Batzordeak urgentziazko eta ohiz kanpoko bilera egin du gaur, astelehenean; izan ere, ezezagunek pintaketak egin zituzten berriro zapatuan, PSE-EEren egoitzaren kanpoaldean, joan den abuztuaren 5ean. Bozeramaileen Batzordeak jazotakoa gaitzetsi du eta sozialistei elkartasuna adierazi die; udal-alderdi politiko gehienen babesa izan du adierazpenak. Oraingoan ere Sopelako EH Bilduk ez du adierazpena babestu. Udal-iturriek aipatu dutenez, "pintaketak zein testuingurutan gertatu diren ez zela aipatzen argudiatu dute" ezkertiarrek. Uztailaren 30ean agertutako pintaketen harira, adierazpen instituzionalaren kontra bozkatu arren, gertatutakoaz ez zuela bat egiten adierazi zuen Sopelako EH Bilduk. [Argazki-galeria]

Sopelako Herriko Etxearen kontrako "eraso kanpainaren" aurrean, "gaitzespenik irmoena" adierazi du Bizkaiko PSE-EEko exekutibak; diotenez, "azken hamar egunetan hiru aldiz" egin dituzte "pintada iraingarriak". Euren berbetan, "bandalismoa bakarrik erabiltzen dakiten horiek dira pintaketen egileak; intolerante batzuk baino ez dira".

Jazoera horien aurrean, "euren irainek eta mehatxuek" ez dituztela "izutuko" adierazi du Bizkaiko PSE-EEren idazkari nagusia den Mikel Torresek: "haiei gustatu ala ez, sozialistok Sopelan eta gainontzeko herrietan egoten jarraituko dugu, demokrazia, askatasuna era errespetua defendatzeko".

Gaineratu duenez, "indarkeriazale hauek ez dakite 'errespetu' hitzaren esanahia; gure Herriko Etxeen hormak eta pertsianak zikintzea ez doa inora, iraganean kateatuta gelditu direla baino ez du adierazten".

Sopelako Bozeramaileen Batzordeak hurrengo hauek adostu ditu:

  • Behin eta berriz ematen ari diren gertaera hauek, egileen izaera totalitario eta antidemokratikoaren adierazgarri dira. 
  • Koldarki egindako eta mehatxatzaileak eta iraingarriak diren indarkeria-ekintza onartezinak dira.
  • Mota hauetako ekintzek, ezmoralak eta ilegalak direnak, ez dute inolako justifikaziorik eta ez dute inoiz Sopelako herritarrak ordezkatzen dituzten indarretan babesik aurkituko. 
  • Sopelako Udalak, onartezinak diren ekintza hauek gertatu arren, bere horretan jarraitu eta bere esku dagoen guztia egingo du herritar guztien eta alderdi politiko desberdinen askatasuna bermatzen eta babesten jarraitzeko eta segurtasunean eskumena duten bestelako instituzioei ere jarrera bera izateko deia egiten die. 
  • Sopelako Udaleko Bozeramaileen Batzordeak, beste behin, bere elkartasuna erakutsi dio Alderdi Sozialistari eta beraien disposiziora dagoela adierazi dio, bere eskubide politikoak askatasun osoz egikaritu ahal izateko.

Argazki-galeria (© Bizkaiko PSE-EE)

Sopelako PSE-EEren kontrako pintaketak (© Bizkaiko PSE-EE)

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa