Lau proposamen Zipiriñe eskolaren leku-arazoei aurre egiteko

Eusko Jaurlaritzaren Hezkuntza Sailak apiril hasieratik du esku artean Sopelako Udalaren eskutitz bat, Zipiriñe eskolaren aspaldiko leku-arazo larriari aurre egiteko talde politikoek egindako proposamenak jasotzen dituena. Sopelako Hezkuntza Mahaiaren azken lan-saioan adostu zen eskutitz hori bidaltzea.

Udaleko talde politikoek, Zipiriñe ikastetxeko zuzendaritzak eta Gurasoen Elkarteko zuzendaritzak osatzen dute Hezkuntza Mahaia. Apirilaren 7an batu ziren azkenekoz, eta talde politikoek eroandako proposamenak Jaurlaritzari jakinaraztea adostu zuten, Udalak berak adierazi duenez. Lau proposamenetatik, bi EAJrenak dira, eta bana egin dute EH Bilduk eta DB-TUk. "Arazoari kontsentsuzko irtenbidea ematea da helburua", dio udal-gobernuak.

Ikastetxea gaur egungo lekuan mantentzea eta instalazioak handitzea da EAJren proposamenen muina; zehazki, proposamen horren arabera orain gimnasioa dagoen lekuan eraikin bat egingo litzateke, solairu bikoa, eta patioari 1.600 metro koadro gehituko litzaizkioke, Goiene kaletik. 

EH Bilduk Loroñon ikastetxe bat eraikitzeko proposamena egin du, eta herri-kontsulta bat egiteko aukera ere ipini du mahaiaren gainean, aukera guztien artean behar bezala informatu ostean. DB-TUk, berriz, Iberreko institutua Loiola inguruan egingo litzatekeen lau solairuko eraikin beri batera eroateko proposatu du, eta Zipiriñeko ziklo batzuk orain Iberre dagoen lekura aldatzeko.

Hezkuntza Sailaren zain

Josu Landaluze alkatearen esanetan, "egin beharreko lehenengo pausoa da Hezkuntza Sailak Zipiriñe sartzea 2019-2023 aldirako Inbertsio Planaren barruan, Iberre institutua handitzeko proiektua sartu den bezala".  

Bidalitako gutunean, Hezkuntza Sailari eskatu diote proposamenen gaineko eztabaidan Sopelako Hezkuntza Mahaia osatzen dute taldeetako kide bana egon dadila. 

Erlazionatuak

"Zipiriñeko familiei pazientzia agortu zaigu"

Sopela

Zipiriñe ikastetxeko gurasoen elkarteak mobilizazioak egingo ditu datozen  egunotan, orain dela ia hamarkada bat hasitako leku-arazoeng...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun