Higiezinen eta ibilgailuen gaineko zergak "izoztuko" ditu Udalak

© SOPELAKO UDALA

Sopelako Udalaren osoko bilkurak, atzo egindako saioan, udal-zerga biren zenbatekoa izoztea erabaki zuen: Ondasun Higiezinen gaineko Zerga (OHZ), eta Trakzio Mekanikoko Ibilgailuen gainekoa (TMIZ). Datorren urterako proposamen fiskal guztiak COVID-19aren ondorioek "markatuko dituztela" adierazi du Josu Landaluze alkateak; "Sopelako familia askok pairatzen duten estutasun ekonomikoa ondo baino hobeto ezagutzen dugu".   

Zergak jaitsita, behera egingo du ere Udalaren diru-bilketak, jakina. Hala eta guzti, zerbitzu publikoen prestazioa babestea datorren ekitaldirako "Udalaren helburu nagusietako bat" izango dela adierazi du alkateak. Zehazki, %20 murriztuko da Udalkutxatik, hau da, Bizkaiko udalerrientzat Aldundiak duen funtsetik jasotzen den dirua.

Horrez gain, pandemiak ezohiko gastu ugari eragin dituela gogorarazi du Udalak: merkatarientzako bonu-kanpainak, herritarrentzako maskarak, Zipiriñen ipinitako karpak... Txanponaren beste aldean daude hainbat kultur ekimen, herriko jaiak barne, bertan behera utzi izanak ekarri duen gastu-murrizketa, besteak beste; baina horren aipamenik ez dute egin udal-iturriek.

Herritarrek ordaindu ohi dituzten zerga nagusi biak izoztuko dira, baina beste batzuetan igoera txikiak izango dira ("doiketak", dio Udalaren prentsa-oharrak), esate baterako gainbalioari dagokionean,  gaur egungo zenbatekoa "inguruko beste udalerri batzuenaren azpitik dagoelako" (Erandio, Berango, Leioa, Getxo...). 

Kaleko salmenta

Bestalde, kaleko salmenta arautuko duen ordenantzaren hasierako onarpena egin zen osoko bilkuran. "Sortzen ari diren saltzeko modu berriak direla eta, horien arteko bizikidetza erregulatzea ere beharrezkoa da", adierazi du udal-gobernuak. Gogoan izan beharra dago iazko udazkenean kaleko bendeja eragozteagatik kexak aurkeztu zirela Udaletxean, eta ondorioz kaleko salmenta arautzeko prozesua abiarazi zela.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun