Atzo, maiatzaren 27an, Sopelako Udalaren osoko bilkura telematikoa egiten ari zirenean, Elkarrekin Podemoseko zinegotzi baten konexio-arazoak zirela eta, oposizioko taldeek –EH Bilduk, Elkarrekin Podemosek eta DBTUk– eskatu zuten prozesua mahai gainean uztea, edo bozketa atzeratzea, eragozpenak konpondu arte. Azaldu dutenez, gobernu-taldeak uko egin zion aukera horri, eta kirol-instalazioak azpikontratatzeko pleguak onartu zituzten, alkatearen kalitatezko botoari esker.
Gogoratu beharra dago EAJ eta PSEk gutxiengoan agintzen dutela Sopelako Udalean, eta, azken hilabeteetan, eztabaida egon dela kirol-instalazioen kudeaketaren inguruan. Otsailean, gobernu-taldeak proposatu zuen 15 gehi 5 urteko luzapena izango zuen lizitazioa egitea, baina oposizioko taldeek proposamena atzera bota zuten. Argudiatu zuten denbora-tarte luzeegia zela, eta kirol-instalazioen udalekotzea edo zuzeneko kudeaketa aztertzearen alde egin zuten.
"Agerian geratu da EAJk ez duela negoziatu nahi izan 20 urterako lizitazio bat eta kirol instalazioetan egindako inbertsioak bezalako gai garrantzitsu bat. Hain zerbitzu garrantzitsua ezin da alkatearen kalitatezko botoarekin onartu, adostasunak askoz handiagoa izan behar du. Azken finean, Sopelako kirol-zerbitzua hipotekatu egin da hurrengo lau legealdietarako", salatu du Guruzne Carrasson EH Bilduko bozeramaileak.
Langileak ERTEn
Bitartean, kirol-instalazioetako 42 langileek lana eteteko aldi baterako espedientean (ERTEn) jarraitzen dute, 2020ko martxotik; beraien egoera salatzeko manifestazioak egin dituzte azken asteetan. Jakinarazi dute enpresa-kudeatzaileak gestionatzen dituen beste kiroldegietan lanean ari direla, beraiek etxean dauden bitartean. "Ez dago jarduerarik enpresak dioelako horrela dirua galduko lukeela, eta ez daudela horretarako prest", nabarmendu du ELA sindikatuko Isabel Garciak.
