Iragan asteetako atxiloketak "herri-mugimenduaren kontrako" estrategia baten baitakoak direla salatu dute

Iragan uztailaren 22an Sopelan atxilotutako gazteei babesa adierazi zieten joan den eguenean udalerrian. Egindako prentsaurrekoan, Espainiako Poliziaren jarrera salatu zuten, baita atxiloketen "izaera arbitrarioa eta guztiz lekuz kanpokoa". Azaldu zuten oraindino ez dakitela jazarritako gazteei zer leporatuko dieten, ezta epaiketa-data zein izango den ere. Hala ere, iragarri zuten apustu-etxe eta joko-aretoen kontrako borrokak jarraituko duela.

Joan den uztailaren 22an, Espainiako Poliziak udalerriko lau gazteren etxeak miatu eta horietako hiru atxilo eraman zituen. Sopeloztarrek jakinarazi dutenez, udalerriko joko-aretoen kontrako protesta-ekimenak egiteagatik salatu dituzte, eta polizia-etxean deklaratu behar izan zuten.

Azaldu dutenaren arabera, oraindino ez dago epaiketa-datarik, eta ez dakite zer leporatuko dieten lau sopeloztar horiei. Hala ere, gogoratu dutenez, atxilo eraman ez zuten gaztearen kasuan, Ertzaintzak eginbideak ireki zizkion duela hilabete bat, eta urriaren 25ean epailearen aurrean deklaratzeko hitzordua zuen.

Hori guztia salatzeko, eta egoeraren berri emateko, prentsaurrekoa egin zuten eguenean, uztailaren 28an, Sopelan. Horretan, aipatutako atxiloketak, "joko-aretoen boterea erakusteaz gainera", azken urteetan herri-mugimenduaren kontrako estrategia baten barruan kokatzen direla salatu zuten: "Herriak du dena aldatzeko ahalmena, eta ez dago herri antolatu bat gelditu dezakeenik. Eurek ondo dakite".

Horren aurrean, iragarri zuten ez direla geldituko, eta azpimarratu dute jarraituko dutela "antolatzen, saretzen, konspiratzen eta lortu nahi dugun guztiaren alde borrokatzen". 

Era berean, apustu-etxe eta joko-aretoek gizartean eragiten dituzten arazoak azaleratu zituzten, eta azaldu zuten horien kontra borrokan jarraituko dutela: "Hau hasi besterik ez da egin".

Erlazionatuak

Atxiloketek borroka eta antolakuntza "kriminalizatzea" helburu dutela salatu dute Sopelan

Sopela

Gaur goizean egindako polizia-operazioa salatu eta atxilotutako lagunei babesa eta elkartasuna adierazi diete Sopelan arrastian batutako 200 pertso...
Espainiako Poliziak Sopelako 3 pertsona atxilotu ditu, “joko aretoek sortzen duten miseria salatzeagatik”

Sopela

Sopelako hainbat herritarrek zabaldu dutenez, Espainiako Poliziak udalerriko 3 pertsona atxilotu eta beste baten etxera joan da. Azaldu dutenaren a...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun