Uztailean, Espainiako Poliziak hiru pertsona atxilotu zituen Sopelan, joko-aretoen aurka egindako protestetan parte-hartzea leporatuta. Agenteak laugarren pertsona baten etxean egon ziren, baina hau ez zuten atxilotu, daborduko, Ertzaintzak beraren aurkako ikerketa-prozesu bat abiatuta zeukalako.
Atzo, abenduaren 20an, hiru atxilotuak eta laugarren ikertua deklaratzera joan behar izan ziren Getxoko epaitegira. Azaldu dutenez, kalteen ustezko delitu batengatik deklaratu zuten, baina oraindik ez dakite zeintzuk diren leporatzen zaizkien karguak.
Apustu-etxeen "arazoa"
HIRUKAn egindako elkarrizketan aditzera eman zutenez, duela hamar urte agertu zen Sopelan oraindik zabalik dagoen lehenengo joko-aretoa, eta beste hainbat herritan lokal horien presentzia ere nabarmen areagotu da azken urteotan. Horrelako establezimenduek sortu dezaketen eraginagaz kezkatuta, herriko hainbat gaztek elkartzea eta joko-aretoen "arazoa sozializatzeko planteamendu desberdinak garatzen" hasi ziren.
"Atxiloketen ostean, arazoak beste dimentsio bat hartu duela uste dugu, eta problematika sozializatzeko zein prozesu judizialari aurre egiteko Zapustu sortu dugu", azaldu zuten plateformako kideek. Beraien helburua da apustu-etxeek sortzen dituzten "arazoak" sozializatzea, eta, horretarako, hainbat ekimen abiarazi dituzte, hala nola beste aisialdi eredu bat aldarrikatzeko ekimenak.
