Prentsaurrekoan, gazteek deitoratu zuten herrian euren jardun politikoa garatzeko propaganda jarri gura izateagatik 3.000 euroko isunak jaso dituztela 2020ko abendutik hona, "baita atxiloketa bat, horren epaiketa, udaltzainen kolpeen ondorioz ospitalizatutako gazte bat eta etengabeko jarraipenak".
Gazte ekintzaileek salatu zuten EAJk "bere indar polizialak" baliatzen dituela kaleak astintzen dituen gazteriaren kontra oldartzeko. Ildo horretan, gogoratu zuten joan den eguenean udaltzain bik Getxoko epaitegietan deklaratu behar izan zutela, "atxilotutako gaztearen eskubide urraketengatik".
Isunak, kolpeak eta jarraipenak gazteen militantzia politikoa "itotzeko maniobra zikinak" direla gogor salatu zuten gazteek: "Gu beldurtu eta desaktibatzea dute helburu". Hala ere, argi utzi zuten ez direla geldituko, "aldarrikapenez kaleak astintzen jarraituko dugu. Eraldaketa soziala eta askapen nazionala helburu, Sopelako gazteok sasi guztien gainetik antolakuntzan eta borrokan jarraituko dugu".
Gainera, urteotan pairatutako errepresioari elkartasunez erantzuteko deia egin zuten; besteak beste, iragarri zuten isunei aurre egiteko jaialdi antierrepresiboa egingo dutela otsailaren 26an, eta materiala eta zozketak salduko dituztela.
