Hautagaiagaz batera, alderdiaren logoa ere eguneratu dute eta diotenez, konpromiso irmoa dute "Udala auzotarren partaidetzara irekitzeko"; horretarako, Azkorra, "bizi guztiko sopeloztarra", izango da alderdiaren zerrendaburu eta bozeramaile berria. Halaber, alderdiko kideek iragarri dute aldaketa zantzuakaz datorren legealdian agintzeko giltza ere izango direla.
Hautagaiak iragarri duenez, alderdiaren jardueren ardatzak izango dira etxebizitza, parkeen handitzea, udalerriko kaleetan oinezkoentzako irisgarritasuna bermatzea, tokiko energia-komunitateen bitartez burujabetza lortzea eta genero-ikuspegia udal-politiketan txertatzea.
Azpimarratu dute hautagaiek udal-talde gisa esperientzia handia dutela, eta hurrengo udal-gobernua osatzeko funtsezkoak izango direla: "Sopelak behar duen gobernua emateko giltza gara"
Zinegotzi kaleratua
Bere aldetik, orain arte DBTUren zinegotzi eta bozeramaile izan den Jon Andoni Gerediagak alderdia utzi eta Bizkaia Bai alderdiagaz aurkeztuko du bere burua Sopelan. Hautagaitza independente horrek Galdakaon ere izango du zerrenda bat, eta diotenez, euren helburua da "estatutuan jasotako printzipioakaz bat datozen Bizkaiko beste udalerri batzuetako bizilagunen eskura dagoen tresna bat izatea".
Gerediagak adierazi du orain arte ordezkatutako alderdia utzi duela kideakaz izandako desadostasunen ondorioz. Azpimarratu duenez, "garrantzitsuena da udalerrian talde politiko independente bat egotea, auzotarren interesak defendatzeaz baino arduratzen ez dena eta ezein alderdiren buruzagitzari obeditu behar ez diona. Bloke handien jarduna kontrolatuko duen prestakuntza".
