Sopelako Loiola Ander Deuna kalean dagoen Karmengo eliza okupatu zutela jakinarazi zuten hainbat gaztek joan den barikuan, hilaren 9an, aspalditik hutsik zegoen eraikinean gune autogestionatu bat sortzeko asmoagaz. Okupazio hori dela eta, gaur, astelehenean, epaiketa azkarra egitekoak ziren, baina, azkenean, hori bertan behera utzi eta eguaztenera arte atzeratu dutela jakinarazi diote HIRUKAri.
Gazteek adierazi dutenez, euren helburua da "Uribe Kostako errealitate desberdinei erantzuna eman diezaioketen gunea sortzea". Horregatik, zapatu goizean, ekainaren 10ean, gosari herrikoia egin zuten eta babesa eskatu zieten herritarrei.
Halaber, Sopelako gobernu-taldeak (EAJ-PSE) tenplua Gotzaindegiari erosteko asmoa adierazi zuen; izan ere, Josu Landaluze alkateak bertan "Bilborock moduko" kultur gune bat egiteko asmoa zuela iragarri zuen. Aldiz, Udaleko oposizioko taldeek eraikina bereganatzeak suposatuko lukeen gastu handiagaz desadostasuna adierazi zuten, hori erosteaz gain kanpotik zein barrutik berritu beharko litzatekeelako.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
