Aurreko uztailean, Sopelako Udalak berretsi egin zuen udalerriko hirigintza-araudiaren aldaketaren hasierako onarpena. Erabaki horri esker, Eusko Jaurlaritzako Hezkuntza Sailaren esku utzi ahal izango dituzte Loroñon eta Abaron dauden lursail bi, Zipiriñe ikastetxeak eta Iberre institutuak dituzten leku-arazoei erantzun ahal izateko. Administrazio-prozesuaren hasierako onarpenagaz Udalak aurreikusi du 2024ko urtarrilerako burutzea lursailak Hezkuntza Sailari lagatzeko prozesua.
Ildo horretan, Udalbatzak herritarrentzako kontsulta-epea ere ireki du, sopeloztarrek proiektuaren inguruan dituzten zalantzak aurkeztu ditzaten; horretarako, informazioa aurrez aurre jasotzeko hitzordua eska dezakete erredakzio-taldeagaz edo bulego teknikoagaz. Hitzorduak Udaleko Bulego Teknikoagaz harremanetan jarriz eska daitezke, 944 065 500 telefono-zenbakira deituz (207 luzapenagaz) edo e-mail bat bidaliz hirigintza@sopela.eus helbide elektronikora.
