Urdulizko Alfredo Espinosa ospitalea inauguratu dute

Urdulizko ospitalean zerbitzuak pribatizatzearen kontra elkartu ziren Osakidetzako sindikatuak.

Iñigo Urkullu Eusko Jaurlaritzako lehendakariak Urdulizko Alfredo Espinosa ospitalea inauguratu zuen joan den barikuan, uztailak 1, Jon Darpon Osasun sailburuagaz, Jon Etxeberria Osakidetzako zuzendari nagusiagaz eta 150 gonbidatuagaz batera. Ospitale berria eguen honetan, uztailak 7, ipiniko dute martxan; kanpoko kontsultak eta erradiologia-zerbitzua, hain zuzen ere. Hurrengo sei hilabeteetan, kanpoko kontsultetan 23.500 pazienteri eta erradiologia-zerbitzuan 26.000 lagunei baino gehiagori arreta eskaintzea aurreikusi dute. Besteak beste, Barrika, Berango, Getxo, Gorliz, Leioa, Lemoiz, Plentzia, Sopela eta Urdulizko bizilagunak zainduko dituzte erietxe berrian.

Inaugurazio-ekitaldiko gonbidatuen artean, Alfredo Espinosaren senideak zeuden; eta "euren babesagaz Urdulizko ospitalea errealitate egiten" lagundu duten erakundeetako, udaletako, Bizkaiko Foru Aldundiko eta jendartearen ordezkariak ere bai.

Iñigo Urkullu EAEko lehendakariak azpimarratutakoaren arabera, Urdulizko Alfredo Espinosa ospitalea Bizkaiko jendartearentzat eta Euskal Autonomia Erkidegokoarentzat, oro har, "albiste bikaina da"; Eusko Jaurlaritzarentzat "pertsonen osasuna lehentasuna" dela frogatzen du. "Euskadi da aurten ospitale publiko berri bat martxan jarri duen autonomia-erkidego bakarra eta Urdulizko ospitaleak Osakidetzaren zerbitzu publiko unibertsal eta kalitatezkoa egunez egun hobetzen eta indartzen jarraitzeko apustu sendoa egin dugula erakusten du", adierazi zuen Urkulluk.

Lehendakariaren berbetan, Urdulizko ospitalea Eusko Jaurlaritzak osasun publiko unibertsal eta kalitatezkoaren alde duen konpromisoaren isla da. Modu berean, "elkarren segidako hainbat gobernuk euskal osasun-sistema publikoaren alde apustu egiten jarraitu dutela erakusten du", bere ustez; izan ere, Osakidetzaren ospitale berri hau sortzeko prozesua azken hiru legegintzaldietan garatu da. Urdulizko Alfredo Espinosa ospitalea, gainera, Eusko Jaurlaritzak legegintzaldi honetan azpiegitura publiko batean egin duen inbertsiorik handiena da. Gaur egungo egoera ekonomikoan, lau urteotan, 153 milioi euro inguru inbertitu dituzte.

Era berean, mota horretako azpiegitura bat martxan ipintzea profesionalentzat erronka bat dela, baina "ilusioa" pizten diela, nabarmendu zuen Urkulluk. Ildo horretan, ospitale berri horretan lan egingo duten profesional guztiak –600 baino gehiago eta 400 lanpostu berri baino gehiago– "gobernu honek pertsonakaz daukan konpromisoagaz aurrera jarraitzera" animatu zituen, "Osakidetza euskal gizartearentzat hurbiltasunaren, arretaren eta kalitatearen aldetik erreferente izan dadin".

Hala ere, sindikatuek beste elkarretaratze bat egin zuten egunean bertan, "pribatizaziorik ez" goiburuagaz; azken hilabeteotan egin dituzten aldarrikapenei jarraituz.

Inaugurazioaren argazki-galeria

urduliz ospitalea

Inaugurazioaren bideoa (IREKIA-EUSKO JAURLARITZA)

Erlazionatuak

Alfredo Espinosa, Agirre Lehendakariaren sailburu fusilatua

Urduliz

1937ko ekainaren 26an fusilatu zuten faxistek Gasteizen. Hilabete honetan inauguratuko dute bere izena daraman Urdulizko ospitalea. Alfredo Espin...
Urdulizko ospitalearen atal batzuen pribatizazioa salatu du ELAk

Urduliz

ELA sindikatu abertzalearen 60 bat kidek elkarretaratzea egin dute gaur eguerdian Urdulizko ospitalearen aurrean, "Urdulizko ospitalean, prekarieta...
Urdulizko ospitaleko sarbideak, auzitan

Sopela

Sopelako Udalaren urtarrileko udalbatzan ospitalearen gaia jorratu zuen EH BIlduko Juan Sanchez zinegotziak, galde-eskeen txandan; Gontzal Hermosil...
Urdulizko ospitale berria; publikoa, euskalduna eta kalitatezkoa!!!

Erabiltzailearen aurpegia Uribe Kosta

Osasun arloaren eta Osakidetzako zuzendaritzaren informazio eta gardentasun faltaren aurrean, Urdulizko ospitalea PUBLIKO, EUSKALDUNA ETA KALITATEZ...
Garraio diputatuak Urdulizko ospitalea dela-eta egindako urratsen berri emango du

Urduliz

Vicente Reyes Garraio, Mugikortasun eta Lurraldearen Kohesiorako foru diputatuak Bizkaiko Batzar Nagusiei azalduko dizkie bere Arloak eman dituen u...