Stellantis taldea da Urdulizko Mecaner enpresaren jabea, eta 148 langilez osatutako fabrika uribekostar historikoa itxiko duela iragarri du. Automobilgintzako multinazionalaren zuzendaritzak erabaki hori jakinarazi zuen hilaren hasieran eta, hala, behargin guztiak kaleratzeko erabakia iragarri zion enpresa-batzordeari (ESK, LAB, ELA eta CCOO sindikatuek osatutakoa).
Sindikatuek ziurtatu dutenez, taldeak 20.000 milioi euroko irabaziak izan zituen iaz, eta salatu dute Europako lantegiak ixteko estrategiaren helburua dela irabazi horiek areagotzea ibilgailuak Txinan edo Marokon fabrikatuta, non langileen kostuak txikiagoak diren eta eskulana merkeagoa den. "Badakigu erabaki hori ez dela hartu ez Urdulizen ez Euskal Herrian, Mecaner kide den eta Peugeot, Citroën, Opel, Jeep eta beste hainbat markaren eraikitzailea den Stellantis multinazionalean hartu da", deitoratu dute beharginek.
#Mecaner-eko eta inguruko beste fabriketako hainbat langilek manifestazioa egin dute salatzeko Stellantis multinazionalak 148 langile kaleratuko dituela.
— Hiruka (@HirukaEus) September 21, 2023
Salatu dute enpresaren itxiera “ez dela ezer berria”, azken urteotan inguruko lantegiak “etengabe” ixten ari baitira. pic.twitter.com/6tK1Lv1RUM
Ildo horretan, grebalariek azaldu dute enpresaren itxiera "ez dela ezer berria", azken urteetan inguruko industria-enpresak etengabe ixten ari direla deitoratuta: "Ekoizpena planetako beste eremu batzuetara lekualdatzen dute gastuak murritzeko, normalean beste langile batzuen esplotazioa sorraraziz". Horri lotuta, salatu dute industriak Euskal Herrian duen pisua gero eta txikiagoa dela, "turismo eta zerbitzuetako herrialde bat bihurtuz".
Horren aurrean, Mecaner enpresako langile-batzordeak bere "desadostasuna" erakutsi du enpresak hartutako erabakiagaz, eta exijitu dio atzera egiteko eta batzordeagaz premiazko bilera bat egiteko alternatibak bilatzeko egoerari. Era berean, Eusko Jaurlaritzari eta Bizkaiko Foru Aldundiari ardura hartzeko eskatu diete langileek, baita Urdulizeko Mecanerren jarraitasuna eta 148 lan postuen mantentzea bermatuko duen konponbidean konprometitzeko deia egin ere.
Urdulizko #Mecaner enpresako langileak lantokiaren aurrealdean elkartu dira eta manifestazioa egingo dute salatzeko Stellantis multinazionalak 148 langile kaleratuko dituela.
— Hiruka (@HirukaEus) September 21, 2023
Ondoren, tokiko Udaleko arduradunakaz batuko dira#mecanerborrokan pic.twitter.com/ByW8n1vHSo
Bitartean, langileek iragarri dute ez direla besoak gurutzatuta geratuko, uste dutelako Mecanerrek etorkizuna duela eta bideragarria dela. Hala, gaurko greba egunean eta mobilizazioan irudikatu duten bezala, antolatuta jarraitu eta euren lanpostuen defentsan borroka egingo dutela iragarri dute.
