Guztira 17 lan aurkeztu ziren iazko 14. Karmele Igartua Sorkuntza Bekara, baina epaimahaiak Gotzone Butronen Kaiolatuak proposamena aukeratu zuen. Hala, Butronek 2.500 euroko dirusaria bereganatu eta Bergarako Idazle Eskolak 2025ean antolatuko dituen edozein modulutan parte hartzeko aukera eskuratu ditu. Kaiolatuak ipuina Idazle Eskolako idazten.com webgunean irakurri daiteke.
Hala deskribatu du du urduliztarrak bere lana: "Kaiolatuak metafora bat da, danok bizi garelako, nonoz, ahultasunen edo obsesioen menpe, baina sortzen diren aukerak, xumeak izanda ere, aprobetxatzen badoguz onik urten gaitezke, ipuinaren protagonistak bezala: bi musikari gazte eta harakin edadetu bat. Umorea ere badu ipuinak".
Azpimarratu duenez, Karmele Igartua Sorkuntza Beka "sari eder bat da, idaztea jarduera bakartia delako, eta errekonozimendu honek hauspoa ematen didalako aurrera egiteko". Horregaz batera, Igartuari bereari ere aipamen berezia egin gura izan dio Butronek, bera bezala, helduaroan idazten hasi zen emakume langilea zelako: "Neu be, berrogeita hamar urterekin hasi naiz idazten, halandaze, sekula ez da berandu edonolako arte-adierazpenari ekiteko".
Sardinerak ipuin ilustratuaren egilea, filosofian lizentziatua eta liburuzaina da Abusu liburutegian ere da, eta, laster, lan gehiago argitaratzeko asmoa duela iragarri du. Momentuz, aurreratu du narrazio liburu bat eta gaztetxoentzako ipuin bat egiten ari dela. "Horiez gain, bi album ilustratu lantzen ari gara Aitziber Raya ilustratzaile derioztarra eta biok, bata haur jaioberriei zuzendua, eta bestea, lehen irakurleei".
